«Syrbar» QR Ulttyq qaýipsizdik komıtetine qosylatyn boldy

NUR-SULTAN. QazAqparat - QR Prezıdenti Qasym-Jomart Toqaevtyń Jarlyǵymen Qazaqstan Respýblıkasynyń «Syrbar» Syrtqy barlaý qyzmeti qaıta uıymdastyrylatyn boldy, dep habarlaıdy QazAqparat Aqordaǵa silteme jasap.

***
Ulttyq qaýipsizdikti nyǵaıtý jáne barlaý qyzmetin odan ápi jetildirý jónindegi sharalar týraly

Qazaqstan Respýblıkasy Konstıtýtsııasynyń 44-babynyń
5) tarmaqshasyna, «Qazaqstan Respýblıkasynyń Prezıdenti týraly» Qazaqstan Respýblıkasy Konstıtýtsııalyq zańynyń 17-1-babyna sáıkes ulttyq qaýipsizdikti nyǵaıtý jáne arnaýly memlekettik organdardyń qurylymyn ońtaılandyrý maqsatynda QAÝLY ETEMІN:

1. Qazaqstan Respýblıkasynyń Ulttyq qaýipsizdik komıtetine qosý arqyly Qazaqstan Respýblıkasynyń «Syrbar» Syrtqy barlaý qyzmeti qaıta uıymdastyrylsyn.

2. Qazaqstan Respýblıkasy Ulttyq qaýipsizdik komıtetiniń vedomstvosy - Qazaqstan Respýblıkasy Ulttyq qaýipsizdik komıtetiniń Syrtqy barlaý qyzmeti (budan ápi - Qyzmet) qurylsyn.

3. Qazaqstan Respýblıkasynyń Ulttyq qaýipsizdik komıteti:

1) Qazaqstan Respýblıkasy Prezıdentiniń qaraýyna Qyzmet týraly erejeniń jobasyn bekitýge usynsyn;

2) osy Jarlyqtan týyndaıtyn ózge de sharalar qabyldasyn.

4. «Qazaqstan Respýblıkasy Prezıdentiniń Ákimshiligi týraly erejeni bekitý týraly» Qazaqstan Respýblıkasy Prezıdentiniń 2008 jylǵy 11 naýryzdaǵy № 552 Jarlyǵyna (Qazaqstan Respýblıkasynyń PÚAJ-y, 2008 j., № 12-13, 116-qujat) mynadaı ózgeris engizilsin:

joǵaryda atalǵan Jarlyqpen bekitilgen Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdardyń tizbesinde:

«Qazaqstan Respýblıkasynyń «Syrbar» Syrtqy barlaý qyzmeti» degen jol alyp tastalsyn.

5. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine jáne Qazaqstan Respýblıkasy Qaýipsizdik Keńesiniń Apparatyna júktelsin.

6. Osy Jarlyq qol qoıylǵan kúninen bastap qoldanysqa engiziledi.

Qazaqstan Respýblıkasynyń
Prezıdenti Q.Toqaev

Nur-Sultan, Aqorda, 2019 jylǵy 17 maýsym

№ 23