«Syra koroli» Toqtar Tóleshovten memleket paıdasyna 1 mlrd 215 mln teńge óndirildi

ShYMKENT. QazAqparat – Shymkenttik prokýrorlar buǵan deıin uzaq merzimge sottalǵan «Syra koroli» Toqtar Tóleshovten qansha aqsha óndirilgenin jarııa etti. Qadaǵalaý organdary ókilderiniń aıtýynsha, kúni búginge deıin sottalýshydan memleket paıdasyna 1 mlrd 215 mln teńge túsken, dep habarlaıdy QazAqparat tilshisi.

Qalalyq prokýratýranyń baspasóz qyzmeti habarlaǵandaı, memlekettik sot oryndaýshysy 2017 jyldan beri Toqtar Tóleshovten memleket paıdasyna 1 mlrd 400 mln teńge óndirýi kerek bolǵan.

«Іs-qujattardy zerdeleý nátıjesinde JShS-niń jarǵylyq kapıtalyndaǵy aktıvteri retinde berilgen boryshker Toqtar Tóleshovke tıesili múlikteri anyqtaldy. Alaıda atalǵan múlikterinen óndirýdi uzaq ýaqyttan beri júzege asyra almaǵan. Qala prokýratýrasynyń tikeleı aralasýymen memlekettik sot oryndaýshy atalǵan múlikterge baǵalaý júrgizdi. Nátıjesinde sottyń uıǵarymy boıynsha olar memleket paıdasyna berildi. Atqarý óndirisiniń aıasynda sottalýshyǵa qatysty úkim oryndalyp, jalpy somasy 1 mlrd 215 mln teńgeni quraıtyn boryshker múlkiniń bıýdjetke túsýi qamtamasyz etildi. Sot úkiminiń ári qaraı oryndalýy prokýratýranyń baqylaýynda bolady», delingen habarlamada.

Eske salaıyq, el ishinde «Syra koroli» atanyp ketken syra zaýytynyń burynǵy qojaıyny Toqtar Tóleshov 2017 jyly Qylmystyq kodekstiń birneshe boıynsha aıypty dep tanylǵan bolatyn. Eńbekshi aýdandyq soty ony túpkilikti 21 jyl bas bostandyǵynan aıyryp, jazany barynsha qatań túrde óteýge úkim etken. Sondaı-aq, burynǵy kásipkerden memleket paıdasyna 1 mlrd 400 mln teńge óndirýdi belgilegen edi.