Syr súleıleriniń jalǵasy Mahambetqalı Tursanov - seksenniń seńgirinde
QYZYLORDA. QazAqparat - Mahambetqalı Tursanov - Syr óńirine keńinen tanymal. Sonaý sekseninshi jyldary aıtys óneri qaıta jandana bastaǵan tusta sahnada jyr tasqynyn seldetip, talaı aıtys dúldúlderin sózben tosty.
Shıeli aýdany Báıgequm aýylynda aıtysker aqynnyń 80 jasqa tolý qurmetine oraı shara uıymdastyryldy. Aýdan ákimi Qaıratbek Sársenbaev aıtys dúldúline ystyq lebizin bildirip, ıyǵyna shapan japty, dep habarlaıdy QazAqparat HAA tilshisi aýdandyq ákimdikke silteme jasap.
Arqaly da adýyn aqyn halyqtyń tirshiligi men ultymyzdyń ulaǵatty ómirin jyrǵa qosty. Mine, sol ataqty aqyn seksen jastyń seńgirine kóterilip, óziniń aqsaqaldyq arda jolyn jalǵastyryp keledi.
Kezdesý keshin «Nartaı» óner mektebiniń dırektory Qurmanbek Bekpeıisov júrgizip, keıipkermen birge júrgen kezeń estelikterin qalyń kórermenmen bólisip otyrdy. Aqynnyń izbasar shákirtteri Kenjebaı Júsip, Rahmatýlla Joltaev, Talǵat Kúzembaev, Erjan Ámirovter arnaý óleńderin jetkizdi. Aıtysker aqynnyń alǵashqy eńbek joly bastalǵan Shıeli agrarly-ındýstrıaldy kolledjiniń stýdentteri aqynnyń birneshe óleńderin oqyp, ár kezeńderdegi aıtystarynan úzindi keltirdi.
Al, «Nartaı» óner mektebiniń ónerpazdar Syr súleıleriniń jalǵasy bolǵan Mahańnyń tolǵaý-termelerin oryndasa, jerlesteri aqsaqaldy qurmettep at mingizdi.
