Syr óńiriniń jurtshylyǵy Elbasynyń tezirek saýyǵyp ketýine tilektestik bildirdi
Oblys ákimi baspasóz qyzmetiniń habarlaýynsha, olardyń qatarynda Syr boıynyń bedeldi azamattary, soǵys jáne eńbek ardagerleri, sport pen óner tarlandary, bıznes jáne jastar ókilderi bar. Bul azamattar Elbasyǵa ystyq yqylasyn arnap, myqty densaýlyq tilep, shynaıy lebizin jetkizgen.
Uly Otan soǵysynyń ardageri, Qyzylorda oblysynyń Qurmetti azamaty, ǵasyr jasaǵan aqsaqal Bóribaı Qulmanov óz tilektestiginde «Siz álem elderin jaılaǵan indettiń aldyn alyp, alǵashqy bolyp jedel sheshim shyǵaryp, tıisti sharalardyń qabyldanýyna zor yqpal ettińiz. Ózińiz Alashtyń anasyna balaǵan Syr jurtshylyǵy pandemııa kezinde Sizdiń halyqqa jasaǵan qamqorlyǵyńyz ben janashyrlyǵyńyzdy erekshe sezindi» dep rızashylyǵyn bildiredi.
Belgili jyraý, Qazaqstannyń eńbek sińirgen qaıratkeri Almas Almatov «Aty jaman naýqas artta qalyp, jaqsy kúnge jetip, elimizdiń budan ári damýyn qara orman halqyńyzdyń Elbasymen birge kórýine násip etsin!» dep aǵynan jarylyp, tilek aıtady.
Qazaqstannyń Eńbek Eri Abzal Eralıev Syr dıqandarynyń atynan «Bul synaqty jeńil eńseredi dep senemiz jáne árqashan denińizge saýlyq tileımiz» dep shynaıy nıettestik tanytsa, memleket jáne qoǵam qaıratkeri, QR UǴA akademıgi Baqbergen Dosmanbetov: «Siz salǵan sara jol arqyly halqymyz kez kelgen qıyndyqty eńseretinine senimim mol!» jyly lebizin arnaǵan.
Mánerlep syrǵanaýdan álem chempıonatynyń kúmis júldegeri, elimizdiń eńbek sińirgen sport sheberi Elızabet Tursynbaeva: «Búgingi kúni álemdi sharpyǵan indettiń Ózińizge de jetkeni týraly habar meni de beıjaı qaldyrmady» dep janashyrlyq bildiredi. Al aýyr atletıkadan álemniń tórt dúrkin chempıony Ilıa Ilın: «Ózińizdi arqańyzda Qazaqstan ósip-órkendep keledi» rızashylyǵyn ańǵartty.
Sondaı-aq, Aral óńiriniń balyqshylary atynan Qazaqstannyń burynǵy Balyq sharýashylyǵy mınıstri, memleket qaıratkeri Qudaıbergen Sarjanov, densaýlyq saqtaý salasynyń ardageri Turǵanbaı Mahanov Tuńǵysh Prezıdentke janashyrlyq tanytyp, tilekterin arnaǵan. «Altyn dombyra» júldesin eki márte ıelengen aıtysker aqyn Muhtar Nııazov rýhanııat salasyn únemi qoldap kele jatqan Nursultan Nazarbaevqa aman-saýlyq tilegen.
Elbasynyń tezirek saýyǵyp ketýine «PetroQazaqstan Qumkól Resorsız» aktsıonerlik qoǵamy, Qorqyt Ata atyndaǵy Qyzylorda memlekettik ýnıversıteti, Qazaly aýdandyq temirjol salasy ujymdary da shyn kóńilden nıettestik bildirgen.