Syr óńiriniń volonterleri «Halyq alǵysy» medalimen marapattaldy

QYZYLORDA. QazAqparat - Koronavırýs pandemııasyna baılanysty elimizde qalyptasqan kúrdeli epıdemıologııalyq ahýal kezeńinde dárigerler, metsenattar men volonterler, áskerı qyzmetshiler, BAQ salasynyń ókilderi halyqqa jan-jaqty kómek kórsetti. Onyń ishinde halyq ıgiligine qyzmet etken «Syr volonterleriniń» qyzmeti erekshe.

Jyl basynan beri Syr volonterleriniń kómegimen óńirimizde 8 451 muqtaj otbasyna áleýmettik kómek kórsetilip, kópbalaly, áleýmettik jaǵynan az qamtylǵan 4 870 otbasynyń mektep jasyndaǵy balalaryna qajetti oqý quraldary tabys etildi.

Sondaı-aq, Qurban aıt kezinde «Aqmeshit-Syrdarııa» ortalyq meshitiniń úılestirýimen Qyzylorda qalasynda - 3 830, aýdandar boıynsha - 3 431 otbasyna qaıyrymdylyq kómek kórsetildi.

«Hıkmet» qaıyrymdylyq qorynyń demeýshiligimen 1 000 otbasyna azyq-túlik túrindegi kómek berildi. Bul sharalarǵa metsenattar, meshit qyzmetkerleri men avtovolonterler jumyldyryldy.

«Myń alǵys!» aktsııasy aıasynda 255 medıtsına qyzmetkeriniń otbasy azyq-túlik ónimderimen, aýrýhanalarda úzdiksiz eńbek etken 1 700 medıtsına qyzmetkeri ystyq tamaqpen qamtamasyz etildi.

Kómek retinde 72 ottegi ballony aýrýhanalarǵa jetkizildi. Aktsııaǵa óńirimizden 88 volonter men 25 avtovolonter jumyldyryldy.

Syn saǵatta volonterlik qyzmet atqarǵan azamattarǵa, azamattyq qoǵam belsendilerine alǵys aıtylyp, olarǵa «Halyq alǵysy» medali jáne oblys ákiminiń Alǵys haty tabystaldy.