Syr óńiriniń syılyǵy elordanyń kórnekti oryndardyń birine aınalady - Elbasy
Memleket basshysy óziniń alǵys hatynda Syr óńiri turǵyndaryn Astana qalasynyń 20 jyldyǵy merekesimen quttyqtap, óziniń júrekjardy lebizin bildirgen.
Elbasy óziniń quttyqtaý hatynda «Qurmetti Qyrymbek Eleýuly! Sizdi jáne búkil Qyzylorda oblysynyń jurtshylyǵyn Astananyń 20 jyldyǵymen shyn júrekten quttyqtaımyn! Táýelsiz Qazaqstannyń sımvoly sanalatyn bas qalamyzdyń aıtýly mereıtoıy - barsha qazaqstandyqtarǵa ortaq qýanysh. Saryarqa tósine qazyǵyn qaqqan eńseli elordamyzdy turǵyzýǵa búkil halqymyz jumyla atsalysty.
Bıyl bas qalanyń týǵan kúnine oraı «Óńirlerdiń Astanaǵa tartýy» jobasy aıasynda Qyzylorda oblysy da erekshe syı jasady.
Zymyrandyq-ǵaryshtyq tehnıkanyń ashyq aspan astyndaǵy mýzeıi Qazaqstannyń ǵarysh salasynda jetekshi memleketterdiń biri ekenin aıǵaqtaıtyn tamasha tartý boldy.
Syr óńiri jurtshylyǵynyń bul syılyǵy qala turǵyndary men qonaqtary úshin qyzyqty ári kórnekti oryndardyń birine aınalatynyna senimdimin.
Astanany kórkeıtýge zor úles qosqan Sizge jáne búkil Qyzylorda oblysynyń turǵyndaryna shynaıy rızashylyǵymdy bildiremin.
Sizderge zor densaýlyq, baq-bereke tileımin!», - delingen quttyqtaý hatynda.
Mereıli mereke qarsańynda qyzylordalyqtar elordada Zymyrandy-ǵaryshtyq tehnıkanyń ashyq aspan astyndaǵy mýzeıin tartý etti. Ol Astananyń sol jaǵalaý bóliginde ornalasqan. Jalpy aýmaǵy - 1,4 gektar. Onda shynaıy ólshemde jasalǵan «Soıýz», «Proton», «Zenıt» zymyran-tasyǵyshtary ornatyldy. Jaqyn arada «Býran» orbıtaaralyq kemesiniń maketi qoıylady, ekspozıtsııa mańyndaǵy aımaq abattandyryldy. Sondaı-aq, keshen aýmaǵynda zymyrandardyń tehnıkalyq sıpattamasy, jasalýy jáne paıdalaný tarıhy týraly barlyq málimetter kórsetilgen arnaıy aqparattyq stendter qoıyldy.
