Syr óńirinen 400 otbasy soltústikke kóshýge daıyn otyr
QYZYLORDA. QazAqparat - «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda bıyl ońtústikten soltústikke kósh jalǵasyn tabady.
Búginde Qyzylorda oblysynan 400 otbasy Soltústik Qazaqstan oblysyna kóshýge bel baılap otyr, dep habarlady QazAqparat tilshisi.
Soltústik Qazaqstan oblysynyń 13 aýdanynda da mamandyq ıeleriniń tapshylyǵy seziledi. Mysaly, qazir onda muǵalimder jetispeýshiligi qatty baıqalyp otyr. Sondaı-aq, densaýlyq saqtaý salasynyń mamandary, elektromonterler, ınjener-mehanıkter, dánekerleýshiler de tapshy. Tipti memlekettik qyzmette de bos oryndar bar.
Qonys aýdarýshylar úshin kóterme aqy tólenip, úı jaldaýǵa jáne kommýnaldyq qyzmet aqylaryna qarjy beriledi. Sonymen qatar, jer telimin alýǵa da múmkindik bar.
Oblystyq jumyspen qamtý jáne áleýmettik baǵdarlamalar basqarmasynyń basshysy M.Ergeshbaevtyń aıtýynsha, soltústik óńirdegi jumys berýshiler aldymen qonys aýdarýǵa nıet bildirgenderdi jumys ornymen, turatyn baspanasymen tanystyrady. Sondaı-aq kóship barǵandardy qajet mamandyqqa oqytý jaǵy da qarastyrylyp otyr.
