Syr óńirindegi Ár otbasy múshesi úshin úsh taldan aktsııasy nátıjesin berýde – Bolat Nurqojaev
«Bizde atalǵan máselege selqostyq bar. Ony bireý atqaryp berýi kerek sekildi. Negizinde kógaldandyrý, qorshaǵan ortany qorǵaý, tabıǵatty lastamaý, taza ustaý - árbir azamattyń paryzy. Árbirimiz aýla jáne kóshe tazalyǵyna basa nazar aýdarýymyz tıis. Men erikti túrde oblys ortalyǵyndaǵy jasyl jelek kólemin arttyrý isine nazar aýdardym. Alǵashqy kezde maǵan qoldaý bildirgen adamdar sany az edi. Qazir olardyń qatary kóbeıdi. Bul iske kóptegen azamattar belsendi túrde qatysa bastady. Olardyń qatarynda kórshi-kólem, aýyl-aımaq turǵyndary bar. Bul - nasıhattyń jemisi. «Aýylyna qarap adamyn tany» deıdi qazaq. Mundaı sátte árbir aýyldyń aýyzbirligi, mádenıeti kórinip turady. Árbir eldi mekenniń kire berisinen jasyl jelektiń kóp bolýy kóńilińe erekshe sezim syılaıtyny belgili. Mundaı ıgilikti bastamany kórgen ózge aýyl turǵyndary oǵan nazar aýdarady degen oıdamyn. Meniń oıymsha, bir turǵynnyń bir kósheni kógaldandyrýyna múmkindigi jetedi. Ony óz tájirıbemnen bilemin. Qazirge deıin sondaı isimizdi eki kóshede jasap úlgerdik. Olardyń biri qazir Qyzylorda qalasyndaǵy qubyr arqyly aıaq sý júrgizilgen, jasyl jelekke oranǵan kóshege aınaldy. Qalanyń móltekaýdandarynda aryq júıesi tazalanyp, aıaq sý berildi. «Aqmeshit-Syrdarııa» meshiti aınalasynda kásipkerler kómegimen sý qubyry júrgizildi. Qazir ımandylyq úıiniń aýlasy turǵyndar saıa tabatyn jerge aınaldy, aınalasy byltyr jasalyp bitti», - dedi Bolat Nurqojaev.
Bıyl elimizdiń Ekologııa mınıstrliginiń bastamasymen ár óńirden ekologııalyq ahýaldy jaqsartýǵa belsene atsalysyp júrgen eko ambassadorlar taǵaıyndaldy. Sol azamattardyń qatarynda Syr óńirinen Bolat Nurqojaev ta bar.
«Bul biz úshin úlken jaýapkershilik júktep otyr. Oblystaǵy ekologııa departamenti, tabıǵı resýrstar basqarmasy, jergilikti atqarýshy bılik arqyly el arasynda ekologııalyq saýattylyq, qorshaǵan ortany qorǵaý máselesine nazar aýdaryldy. Endi eko ambassador retinde bul máseleni keńinen nasıhattaýdy qolǵa alatyn bolamyz. Bıyl - eriktiler jyly. Negizinde bizdiń óńirdiń tabıǵaty qatal, kógaldandyrý ońaı jasala bermeıdi. Biraq, eńbektenseń bizde de jasyl baq jasaýǵa barlyq múmkindik bar. Qýantarlyǵy, qazir turǵyndar arasynda oǵan degen qyzyǵýshylyq artyp keledi. Osydan birneshe jyl buryn aıaq sý kelmegendikten aptap ystyqta aǵashtardyń qýrap qalý jaǵdaıy kezdesedi. Buryn sondaı kúıdi keshken aǵashtar qazir qalanyń kire beris bas kóshesinde jaıqalyp tur. Turǵyndar saıasynda serýendeıdi. Bul oryndar úlken alleıa, baý-baqshaǵa aınaldy. Bunyń bári bireýge kishkene jumys kórinýi múmkin. Biraq tabıǵatqa degen janashyrlyq qozǵalysy bastaldy. Nátıjesi bolary da sózsiz. Kóktemde ár otbasy múshesi úshin «Úsh taldan» aktsııasy bastaldy. ıAǵnı árbir otbasy múshesi úsh taldy egedi, onyń kútimin baqylaıdy. Ony sýaryp, baptap, úlken jaıqalǵan tal bolýyna óz úlesin qosady. Áleýmettik jeli arqyly taralǵan bul aktsııaǵa alys aýdan turǵyndary da ún qosty», - dedi ol.
Onyń aıtýynsha, aımaqtaǵy ekologııalyq ahýaldy jaqsartý baǵytynda birqatar jobalar qolǵa alynǵan. Olardyń qatarynda SARATS jobasy qolǵa alynǵannan bastap nazar aýdarylyp kele jatqan jobalar bar. Oblystyq tabıǵı resýrstar basqarmasy tarapynan qurylǵan jumysshy toby Aral teńizi akvatorııasynyń qazirgi deńgeıinde sý toltyrýǵa bolatyn Jalańash kóli máselesi qarastyrylýda. Ony tipti óz qarjysyna jasaımyn degen jergilikti kásipkerler de daıyn. Tek saraptama, joba, kelisimnen ótip ruqsat qujattaryn kútýde.
«Týǵan jerge janashyrlyq, otansúıgishtik otbasyndaǵy tárbıe arqyly urpaqtan urpaqqa jalǵasady. Ol janashyrlyqtan, tazalyq saqtaýdan bastalady. Bizdiń tabıǵatqa janashyrlyq tanytatyn ýaqytymyz keldi. Ony halyqtyq jappaı qozǵalysqa aınaldyrýymyz tıis. Tek osylaı ǵana elimizdiń tabıǵat baılyǵyn tek paıdalanýshy emes, molaıtýǵa zor úlesimizdi qosa alamyz», - dedi B.Nurqojaev.
