Syr óńirinde jetispeıtin medıtsına mamandary úshin oblys ákimi grant bóldi
QYZYLORDA. QazAqparat - Syr boıynda medıtsına kadrlarynyń jetispeýshiligin sheshý maqsatynda «Joǵarǵy medıtsınalyq jáne farmatsevtıkalyq mamandardy qaıta daıarlaý jáne olardyń biliktiligin arttyrýdyń 2016-2018 jyldarǵa arnalǵan 3 jyldyq perspektıvti jospary» bekitildi.
Kadrlardy oqytý, qaıta daıarlaý jáne biliktiligin jetildirý úshin 60 mln. teńge bólindi. Bul týraly Qyzylorda oblysynyń densaýlyq saqtaý basqarmasy basshysy Aqmaral Álnazarova aıtty, dep habarlady QazAqparat tilshisi.
«Qaıta daıarlaý kýrstary arqyly asa qajetti mamandyqtar boıynsha 135 dáriger qaıta oqytyldy. Osy arqyly bıyl neanotolog, travmatolog, onkolog sııaqty óte qajetti mamandar zárýligi sheshildi. Oblys basshysynyń tapsyrmasymen kadrlyq rezerv qurý jáne qaıta daıarlaý úshin densaýlyq saqtaý salasynyń 15 mamany Polshada oqytyldy. Dárigerlerdiń 59,4%-y bilimderin jetildirdi», - deıdi basqarma basshysy.
Osy jyly 81 jas maman oblystyń densaýlyq saqtaý salasyna tartylyp, onyń 60%-y BMSK (Bastapqy medıtsınalyq-sanıtarlyq kómek) uıymdaryna jiberildi. Qazirgi tańda BMSK uıymdarynyń dárigerlermen qamtylý kórsetkishi 95%-ǵa jetti.
