Syr óńirinde týǵan jomart jandar anyqtaldy

QYZYLORDA. QazAqparat - Syr topyraǵynda dúnıege kelip, esimi álemdik jáne respýblıkalyq deńgeıde elge tanylyp júrgen azamattar Qyzylorda oblysynda ótkizilgen «Týǵan jerge taǵzym» aktsııasyna arnaıy keldi. Olardyń qatarynda mádenıet, medıtsına, óner, jýrnalıstıka jáne basqa sala ókilderi bar, dep habarlaıdy QazAqparat tilshisi.

Syr óńirinen shyqqan tanymal azamattar qaı kezde de týǵan jerdi esten shyǵarmaıdy. Óziniń tarapynan týǵan jerdi túletýge jáne keńinen tanytýǵa zor úles qosyp keledi. Elimizge belgili kompozıtor Keńes Dúısekeev bıyl Qyzylorda qalasynyń 200 jyldyǵyna arnalǵan «Syr eli» ániniń tusaýyn kesip, óz jerlesteriniń zor qoshemetine bólendi.

«Qyzylorda oblysynda daryndy ónerpazdardy qoldaý maqsatynda kóptegen ıgilikti is-sharalar atqarylyp keledi. Byltyr belgili ánshi Roza Baǵlanova atyndaǵy respýblıkalyq baıqaýdy Syr óńirinde ótkizýge usynys bildirgen edik. Bul usynysymyz qoldaý tapty. Bıyl baıqaý alǵash ret ótkizilip, daryndy órender júldeli oryndardan kórindi. Biz týǵan jerge qurmet retinde osyndaı is-sharalarǵa qoldaý jasaýǵa ár kezde daıynbyz», - dedi Keńes Dúısekeev.

Sońǵy jyldarda turaqty túrde ótkizilip kele jatqan aktsııa barysynda belgili jýrnalıst Nurtóre Júsip barsha syrboıylyq azamattardy týǵan jerdi túletýge úles qosýǵa shaqyrdy. Tarıh ǵylymdarynyń doktory Bereket Káribaev Syr óńiriniń ejelgi tarıhy jóninde jóninde oı-pikirin bildirdi.

Sondaı-aq, aktsııa barysynda qaıyrymdylyq kómegin jasaǵan birqatar azamattarǵa «Jomart júrek» nomınatsııasy tabys etildi. Olardyń qatarynda Shıeli aýdany Sh.Qodamanov aýylynda 90 mln teńgege sport keshenin salyp bergen Baýyrjan Kópeev «Jyl metsenaty» atandy. Sondaı-aq, 150-ge jýyq adamdy eńbekpen qamtyp, qaıyrymdylyq sharalarynda 2 mln teńgege jýyq qarjylaı demeýshilik jasaǵan kásipker Aqshagúl Mahatova «Jyl tulǵasy» boldy. Ózge de azamattar túrli nomınatsııa boıynsha maraptaqa ıe boldy.