Syr óńirinde «Kyzylorda-Franch - 2017» óńirlik forýmy ótti
QYZYLORDA. QazAqparat-Seısenbide Qyzylordadaǵy «Bastaý bıznes» ortalyǵynda «Kyzylorda-Franch - 2017» forýmy ótti, dep habarlady QazAqparat tilshisi oblystyq ishki saıasat basqarmasyna silteme jasap.
Forýmnyń negizgi maqsaty - franchaızıng qarym-qatynastaryn ulǵaıtý arqyly aımaqta shaǵyn jáne orta bıznesti damytýǵa yqpal jasaý, jergilikti kásipkerler men otandyq, sheteldik franchaızer kompanııalar arasynda tıimdi baılanys ornatý.
Jıyndy Qazaqstan franchaızıng qaýymdastyǵynyń vıtse-prezıdenti Ádemi Dosjanova júrgizip otyrdy. Qaýymdastyq prezıdenti Beknur Qısyqov, «Damý» qory Qyzylorda fılıaly dırektorynyń mindetin atqarýshy Ǵabıt Qulmahan jáne taǵy basqa qatysýshylar baıandama jasady.
Sonymen birge, forým barysynda tabysty franshızalardyń tanystyrylymy, otandyq jáne sheteldik franchaızer kompanııalarymen B2B kezdesýler, taqyryptyq prezentatsııalar uıymdastyryldy.
