Syr óńirinde qaterli indettiń beti qaıta bastady
QYZYLORDA. QazAqparat - Qyzylorda oblysynda sońǵy tórt kúnde birde-bir koronavırýs ınfektsııasyn juqtyrý deregi tirkelgen joq, dep habarlaıdy QazAqparat tilshisi.
Óńir turǵyndary arasynda 27-31 tamyz aralyǵynda qaterli indetti juqtyrǵan azamattar bolǵan joq.
Búgingi kúnge deıin Qyzylorda oblysynda 3231 adamǵa koronavırýs ınfektsııasy dıagnozy qoıylǵan. Onyń ishinde 3064 adam aýrýdan saýyǵyp shyqty. Ókinishtisi, oblysta 10 adam qaterli indet saldarynan kóz jumdy.
Koronavırýs ınfektsııasyn juqtyrǵandar arasynda Qyzylorda qalasy turǵyndarynyń sany basym. Atalǵan indet oblystyń barlyq aýdanynda tirkeldi.
Qyzylorda oblysynda naýqastardyń saýyǵyp shyǵýyna baılanysty birqatar provızorlyq statsıonarlar jabyldy. Qaterli indet órshigen tusta Qyzylorda qalasy, Aral, Jalaǵash jáne ózge aýdandarda ashylǵan emdeý oryndary qalypty jumys yrǵaǵyna kóshti.
