Syr óńirinde et eksporty jolǵa qoıylyp keledi
Basqarma málimetterine súıensek, óńirde bıylǵy jyldyń osy mezgilinde 295,4 myń bas sıyr, 704,3 myń bas qoı men eshki, 120,9 myń bas jylqy, 44,7 myń bas túıe, 2,1 myń bas shoshqa jáne 103,4 myń bas qus ósirilýde. Jyl basynan beri oblys boıynsha barlyǵy 24,2 myń tonna et, 61,3 myń tonna sút, 793,4 tonna jún jáne 4678,0 myń dana jumyrtqa óndirildi. Mınıstrlik bekitken eksportqa et shyǵarýdyń ındıkatıvtik josparyna sáıkes aǵymdaǵy jyly oblystan eksportqa 100 tonna sıyr etin, 25 tonna qoı etin shyǵarý kózdelgen.
Deı tursa da, oblys kóleminde halyqaralyq standarttarǵa sáıkes keletin et kombınaty bolmaǵandyqtan, ázirge eksportqa salqyndatylǵan nemese tońazytylǵan etti shyǵarýǵa múmkindik joq.
Osyǵan baılanysty et kombınatyn salý maqsatynda «Syr marjany» JShS-gi Iran Islam Respýblıkasynyń «Inchen Broon Cooperative, Inc» kompanııasymen kelisimge kelip, et kombınatynyń jobalyq smetalyq qujattaryn ázirleý ústinde.
Iran Islam Respýblıkasynyń «Inchen Broon Cooperative, Inc» kompanııasymen jasalǵan kelisimderge sáıkes, aǵymdaǵy jyldyń 15 tamyzynda Qyzylorda qalasyna qarasty «Kúshimbaev Agro» aýyl sharýashylyǵy kooperatıvi Iran Islam Respýblıkasynyń «Inchen Broon Cooperative, Inc» kompanııasyna tirileı salmaǵy 26,5 tonnany quraıtyn 812 bas qozyny eksportqa shyǵardy. Bul baǵyttaǵy jumystar oblys ákimi Q. Kósherbaevtyń Iran Islam Respýblıkasyndaǵy bolyp qaıtqan jumys sapary barysynda da keń kólemde talqylandy. Syr boıylyq kásipkerler Gúlistan jáne Mazandaran provıntsııalaryndaǵy aýyl sharýashylyǵy, óndiris oryndaryn aralap kórip, Irannyń bıznes qaýymdastyǵyna ortaq jobalardy tanystyrdy.
Qyzylordalyq delegatsııa Gúlistan provıntsııasynda aýyl sharýashylyǵy ónimderin óńdeý, mal sharýashylyǵy salasyndaǵy iri kompanııalardyń basshylarymen kezdestip, provıntsııanyń gýbernatory Seııd Manof Hashemımen birlese atqarylatyn jumystardy talqylady.
Budan bólek, «Qyzylorda oblysy men Gúlistan provıntsııasy arasyndaǵy ekonomıkalyq jáne ınvestıtsııalyq baılanys» taqyrybynda bıznes forým ótkizilip, naqty jobalar boıynsha memorandýmdarǵa qol qoıyldy.
Sonymen qatar, Jańaqorǵan aýdany tirileı salmaǵy 36,5 tonnany quraıtyn 1132 bas qozyny Jambyl oblysy arqyly Birikken Arab Ámirligine eksportqa shyǵardy.
Qyzylorda oblysynda Elbasynyń bes ınstıtýtsıonaldyq reformany júzege asyrý jónindegi 100 naqty qadamyndaǵy 61-qadamda naqtylanǵan mindetke saı kóptegen sharýalar iske asyp keledi. Onda: Et óndiris men óńdeýdi damytý úshin strategııalyq ınvestorlardy tartý máselesi aıtylǵan bolatyn. Sonymen birge negizgi mindet shıkizat bazasyn damytý jáne óńdelgen ónimderdi eksporttaý mindeti de qoıyldy. Syr óńiri búgingi tańda bul mindetter údesinen shyǵyp otyr.
