Syr óńirinde analarǵa arnalyp, eskertkishter ashylmaq
QYZYLORDA. QazAqparat - Syr óńirindegi barlyq aýdanda anaǵa qurmet retinde eskertkishter ashý kózdelip otyr. Bul jaǵymdy jańalyq oblys ákimi Qyrymbek Kósherbaev qatysqan áıelder merekesine arnalǵan saltanatty shara barysynda aıtyldy, dep habarlaıdy QazAqparat.
Byltyr Qyzylorda qalasynyń ortalyq bóliginde ázız analar qurmetine arnalǵan «Ana baqyty» eskertkishi boı kótergen edi. Atalmysh oryn qazir jergilikti turǵyndardyń ardaq tutar jerine aınaldy. Endigi kezekte osyndaı sáýletti oryndardy oblystyń barlyq aýdanynda el ıgiligine berý oılastyrylýda.
«Aıaýly jandarǵa qurmet kórsetý - bizdiń azamattyq paryzymyz, perzenttik boryshymyz. Qoǵam men memleket damýyna belsene atsalysyp júrgen áıelderge aıtar alǵysymyz zor»,- dedi oblystyq máslıhat hatshysy Naýryzbaı Baıqadamov.
Syr óńiriniń damýynda áıel-analardyń qosqan úlesi óte zor. Názik jandylar qoǵamnyń qaı salasynda jemisti eńbek etip keledi. Sonyń aıǵaǵy retinde búginde oblystyń negizgi salasy sanatyndaǵy 5 basqarmaǵa áıelder basshylyq jasap otyrǵanyn aıta ketelik. Sondaı-aq, memlekettiń qyzmette 3570 adam qyzmet etse, olardyń 46 paıyzy názik jandylar bolyp tabylady.
Qyzylorda oblysy altyn qursaqty analar sany jóninen de aldyńǵy lekte keledi. Búginde oblysta 44 myńǵa jýyq kóp balaly analar bar. Olardyń arasynda 27 myńnan astamy Batyr ana sanalady. Onyń ishinde 14 myńǵa jýyǵy «Altyn alqa» alsa, qalǵany «Kúmis alqa» ıegerleri. Sonymen qatar, jylma-jyl ósip kele jatqan kásipkerler qatarynda áıelder kóp.
Saltanatty shara barysynda elimizge belgili jáne jergilikti óner maıtalmandary án men jyrdan shashý shashty.
Ádilet Qańtarbaev
