Syr óńirinde 3 myńǵa jýyq otbasy baspanaly bolmaq

QYZYLORDA. QazAqparat – Qyzylorda oblysynda 1 924 páterlik kópqabatty 36 turǵyn úıdiń qurylysy júrgizilip jatyr. Bıyl 1430 páter halyq ıgiligine tabystalady. Bul týraly oblys ákimi Nurlybek Nálibaev óńir máslıhatynyń kezekti V sessııasynda aıtty, dep habarlaıdy QazAqparat.

«Qazir oblys kóleminde 31,4 mlrd teńgege 130 myń sharshy metr bolatyn 1 924 páterlik 36 kópqabatty turǵyn úıdiń qurylysy júrgizilýde. Bıyl 30 úı (93 myń sharshy metr, 1430 páter) halyq ıgiligine tabystalady. Budan bólek, áleýmettik osal toptarǵa 1000 páter satyp alýǵa (600 páter Qyzylorda qalasynda, 400 páter aýdandarda) respýblıkalyq bıýdjetten 9,6 mlrd teńge bólindi», - dedi aımaq basshysy.

Eldiń ál-aýqatyn arttyrýdyń taǵy da bir ólshemsharty – ınjenerlik-kommýnıkatsııalyq ınfraqurylymdy damytý. Oblys halqynyń 98,1 paıyzy ortalyqtandyrylǵan aýyz sýmen qamtylǵan. Bul kórsetkishti 100 paıyzǵa jetkizýge jumystar jasalýda (230 eldi mekenniń 198-i sý júıesine qosylǵan). Ótken jyly 6 aýyl «kógildir otynǵa» qosylyp, halyqty gazdandyrý deńgeıi 70 paıyzǵa jetti. Bıyl taǵy da 12 eldi mekenge tabıǵı gaz tartylyp, gazdandyrý deńgeıi 75 paıyz bolady.

Jergilikti mańyzy bar 366 shaqyrym avtomobıl jolynyń jaqsy jaǵdaıdaǵy úlesi ótken jyly 82 paıyzdy quraǵan. Bıyl bul kórsetkish 87 paıyzǵa jetkizilmek. Búginde Qyzylorda qalasynda 141 shaqyrym kósheni jóndeý jumystary qarqyndy júrgizilip jatyr. Shet aımaq, kentter, aýyldar da nazardan tys qalǵan joq.

Nurlybek Mashbekuly kólik aǵymy kóp Sultan Beıbarys, Nazarbaev jáne Astana dańǵyly sııaqty ortalyq kóshelerde jol jóndeý jumystary aldaǵy 10-15 kúnde aıaqtalatynyn aıtyp, ýaqytsha qolaısyzdyqqa túsinistikpen qaraýdy surady.