Syr óńirinde «100 jańa esim» jobasynyń aımaqtyq nusqasy jasalady
Qyzylorda oblystyq ishki saıasat basqarmasynyń basshysy Talǵat Mahanov óńirlik kommýnıkatsııalar qyzmetinde ótken baspasóz máslıhatynda osyndaı jaǵymdy jańalyqty jetkizdi.
Eskerte ketetin bir jaıt, qazir joba tek respýblıka deńgeıinde ǵana iske asyrylýda. Aldaǵy ýaqytta jobanyń formatyn jetildirip, ár sala boıynsha qala jáne aýdan kóleminde tabysqa jetken azamattardy anyqtaý úshin jumys jasalady. Ústimizdegi jyly oblystyq «Rýhanı jańǵyrý» ortalyǵy jobaǵa qatysýshy úmitkerlerdi tirkeý jumystaryn bastap ketti. Qazirgi tańda aımaqtyń maqtanysh tutarlyq deńgeıde tabysqa jetken 13 úmitker tirkeldi. Olardyń arasynda Ilıa Ilın, Elızabet Tursynbaı, Ǵalymjan Báıimbet, Qamshybek Qońqabaev, Maǵjan Eralıev, Saǵatbek Qýanyshbaıuly syndy jastar bar. Byltyr aımaqta 4 azamat respýblıkalyq deńgeıdegi jobanyń jeńimpazy atanǵan edi. Olardyń arasynda hırýrg-dáriger Bolatbek Baımahanov, toǵyzqumalaqshy Ásel Dálıeva, selektsıoner-ǵalym Aleksandr Nıkolaevıch Podolskıh jáne pedagog-psıholog Symbat Ábdirahmanova bar edi. Ótken jyly Syr óńirinen 84 azamat úmitker retinde tirkelgen bolatyn.
«Jyl boıyna atalmysh jeńimpazdar halyqpen túrli kezdesýler ótkizdi. Árbir kezdesýdiń taǵylym alarlyq tustary kóp boldy. Ras, tarıhı tulǵalarǵa toly Syr óńirinen nebári 4 jeńimpaz tabysty dep tanylýy azdyq etedi. Sondyqtan jobanyń byılǵy ekinshi kezeńine barynsha belsendilikpen qatysýǵa jáne tabysty tulǵalardy tanytýymyz tıis», - dedi oblystyq «Rýhanı jańǵyrý» ortalyǵynyń basshysy Nurlybek Myńjas.
