Syr óńiri jyr súleılerin dúnıege ákelgen qutty meken - Maıra Sársenbaeva

QYZYLORDA. QazAqparat - Aldaǵy ýaqytta Elbasynyń «Uly Dalanyń jeti qyry» maqalasyna Syr óńirinde kóptegen ıgilikti sharalar júzege asady. Syr boıyndaǵy jyraýlyq ónerdi dáripteı otyryp, bul baǵytta búgingi urpaqqa ulaǵat bolatyn mańyzdy jobalar qolǵa alynady. Belgili jyraý, oblystyq halyq shyǵarmashylyǵyn damytý jáne mádenı-prodıýserlik ortalyǵynyń jyraýlarmen jumys sektorynyń meńgerýshisi Maıra Sársenbaeva QazAqparat tilshisine Elbasynyń «Uly Dalanyń jeti qyry» maqalasyna  oraı oı-pikirin osylaısha bildirdi.

«Atap aıtqanda, olardyń qatarynda jyr mektepteri men jyr-terme úıirmeleriniń jeke-jeke kontsertterin uıymdastyrý, jyraýlyq mektepteri arasynda Syr boıyndaǵy aqyn-shaıyrlardyń terme-qıssalaryn oryndaýshylardyń jáne qobyz úıirme músheleriniń oblystyq baıqaýlaryn ótkizý josparda bar. Sondaı-aq, «Súleılerdiń jolymen» atty osy óńirdegi jyraýlyq mektepteri shákirtteriniń arasynda oblystyq baıqaýyn, «Káýsar bulaq» atty respýblıkalyq dástúrli óner festıvalin, orta býyn jyraýlardyń sheberlik dáristerin uıymdastyrý oılastyrylǵan. Sonymen qatar, oblystyq «Atadan qalǵan asyl jyr» oblystyq semınar, dáris-kontsertter ótkizý jáne shákirtterdi oblystyq, respýblıkalyq, halyqaralyq baıqaý-festıvalderge qatystyrý da josparlanyp otyr. Sondaı-aq, Súleılerdiń jaýhar jyrlaryn jattatý, qobyzben súıemeldep jyr aıtý arqyly ulttyq ónerdi dáripteıtin tulǵa qalyptastyrý, jyr álemine jańa esimder shyǵarý maqsatynda «Jyr mura» jobasy usynyldy», - dedi Maıra Sársenbaeva.

Onyń aıtýynsha, Syr óńiri  talaı-talaı dúldúlderdi, súleılerdi, shaıyrlardy dúnıege ákelgen qutty meken. Bul óńirde ata babamyzdyń salyp ketken sara joly jatyr.

«Aıta ketý kerek, Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda kóptegen aýqymdy jumystar atqaryldy. Ózderińizge belgili, kúlli túrki álemine ortaq tulǵa, uly oıshyl Qorqyt atanyń muralaryn keıingi urpaqqa amanattaý maqsatynda Qorqyt ata muralaryn ıÝNESKO-nyń tizimine engizý úshin oblysymyzda kóptegen sharalar uıymdastyryldy. Osy jumystyń nátıjesinde jeti aýdanda qobyz úıirmeleri ashylyp, oǵan kásibı mamandar dáris berýde. Sondaı-aq, bıyl alǵash ret Syr óńirinde «Qorqyt-Qobyz» atty respýblıkalyq qyl qobyzshylarmen qobyzben súıemeldep jyr aıtýshylardyń baıqaýy ótip rýhanı qaýymnyń kóńilinen shyqty», - dedi M.Sársenbaeva.

Ol babalar murasyn nasıhattaý maqsatynda Qarmaqshy aýdanyndaǵy Kósheneı Rústembekuly atyndaǵy Jyraýlar Úıi, Sársenbaı jyraý atyndaǵy jyr synyby (aýdandyq Áýez mektebi janynda), Aral aýdanynda Nurtýǵan shaıyr mektebi, Shıeli aýdanynda Nartaı jyr mektepteri jumys jasap jatqanyn aıtyp ótti. Búgingi tańda osy jyr mektepterinde 206 oqýshy dáris alady.

«Ulttyq mura - jyraýlyq dástúrdi keıingi tyńdaýshy qaýymǵa nasıhattaý maqsatynda ústimizdegi jyly 13 qarashada A.Toqmaǵambetov atyndaǵy qalalyq mádenıet úıinde «Kerýen jyrdyń jalǵasy...» atty Syr boıyndaǵy jyraýlyq mektep shákirtteriniń kontserti uıymdastyrylyp, kontsertte Qarmaqshy aýdanyndaǵy Kósheneı Rústembekov atyndaǵy Jyraýlar úıiniń, Turymbet Salqynbaıuly atyndaǵy áýez mektebiniń, Aral aýdandyq mədenıet ortalyǵynyń, Qazaly aýdanyndaǵy Baınazar Ótepov atyndaǵy jyr úıirmeleriniń, Shıeli aýdanyndaǵy Nartaı jyr mektebiniń jəne Qyzylorda qalasyndaǵy jyr úıirmeleriniń shəkirtteri óner kórsetti. Baıqaýǵa ár mektep ókilderi jyraýlary qatysyp, ózara pikir alysty», - dedi ol.

Joba aıasynda Syr súleıleriniń buryn-sońdy kóp oryndalmaı júrgen jyrlary, maqam-sazdary jınaqtalyp, jas býyn talanttarǵa úıretiledi. Sonymen qatar, ónerpazdarymyzdyń oryndaýyndaǵy jyr-termelerden SD-dısk daıyndalyp, aýdandyq, aýyldyq eldi mekenderdegi mádenıet oshaqtaryna ádistemelik qural retinde taratylatyn bolady.

«Sonymen birge, Elbasymyz atap ótkendeı, Dala folklory men mýzykasynyń jyly jobasy aıasynda Syr súleıleriniń áli de jınaqtalmaı júrgen maqam-sazdary, jyr-terme, dastandaryn jınaqtaý úshin arnaıy ekspedıtsııa qurylyp, el arasyndaǵy mádenı muralar mýzykalyq antologııa bolyp jaryqqa shyǵady degen josparymyz bar», - dedi M.Sársenbaeva.