Syr óńiri túıe sútinen untaq shyǵarýdy qolǵa almaq
«Indýstrııalandyrýdyń úshinshi besjyldyǵy aıasynda 2025 jylǵa deıin óńirde jalpy quny 551,2 mlrd teńge bolatyn 23 jobany iske asyrý kózdelip otyr. Joba aıasynda 6400 jańa jumys ornyn qurý josparlanǵan. Sondaı-aq, osy jyly 44,2 mlrd teńge somasyndaǵy úsh jobanyń qurylysy bastaldy» dep atap ótedi ákimdikten.
Atap aıtqanda, «Qazaqstan Akvakýltýra LTD» JShS Aral aýdanynda qýaty jylyna 4 myń tonna balyqty tereń óńdeıtin zaýyt iske qosady. Joba quny - 160 mln teńge. Onyń aıasynda 100 jańa jumys ornyn qurý qarastyrylǵan. Al «Qarmaqshy qus» JShS Qarmaqshy aýdanynda qýaty jylyna 1500 tonna qus etin óndiretin qus fabrıkasyn iske qosýdy josparlap otyr. Joba quny - 1,9 mlrd teńge, óndiriste shamamen 50 adam jumyspen qamtylady.
Úshinshi joba - Qyzylorda qalasynda tabaq shyny óndiretin zaýyt qurylysy. Jobany «Orda Glass» JShS júzege asyrady. Zaýyttyń jyldyq qýaty -197,1 myń tonna. Al, quny - 42,1 mlrd teńge. Zaýyt iske qosylǵan ýaqytta 226 adamdy jumyspen qamtamasyz etedi.
Sonymen qatar, Aral aýdanynda «Qazaq Camel» JShS túıe sútinen jylyna 130 tonnaǵa deıin untaq óndiretin zaýyttyń qurylysy boıynsha jobany iske asyrýdy bastady. Jobanyń quny - 1,5 mlrd teńge. Kásiporyn 150 adamdy jumyspen qamtıdy.
«Osy jyldyń ekinshi jartyjyldyǵynda taǵy eki joba iske asady. Atap aıtqanda, Aral aýdanynda qýattylyǵy jylyna 300 myń tonna kaltsıılengen soda óndiretin zaýyttyń qurylysy bastalady. Jobany «Aral Soda» JShS júzege asyrady. Jobanyń quny - 93,5 mlrd teńge. Zaýytty paıdalanýǵa berý arqyly 699 jańa jumys ornyn qurýǵa múmkindik ashylady. «ABK Prom Service« JShS Qyzylorda qalasynda joǵary qysymdy shyny plastık jelilik jáne sorǵy-kompressorlyq qubyrlardy óndiretin zaýyt qurylysyn bastaýdy josparlap otyr. Zaýyttyń qýattylyǵy - jylyna 300 shaqyrym qubyr shyǵarý. Quny - 1,8 mlrd teńge bolatyn zaýyt shamamen 80 adam jumyspen qamtıdy» dep atap ótedi óńir ákimdiginen.
