Syr óńiri elimizde jumys istep turǵan kásipkerlik nysandar boıynsha kósh bastap tur
QYZYLORDA. QazAqparat - Qyzylorda oblysy jumys istep turǵan kásipkerlik nysandary jóninen elimiz boıynsha kósh bastap tur. Bıyl oblysta jumys istep turǵan kásipkerlik sýbektiler 11 paıyzǵa kóbeıip otyr, dep habarlaıdy QazAqparat tilshisi.
Qyzylorda oblysynda bıylǵy jyldyń 1 shildesine deıin tirkelgen kásipkerlik sýbektiler sany 51 753-ti qurady. Bul ótken 2017 jylǵa qaraǵanda 6,3 paıyzǵa artyq.
«2018 jyl oblysymyzda «Jappaı kásipkerlikti qoldaý jyly» bolyp jarııalanǵany belgili. Keshendi «Jol kartasy» ázirlenip, nátıjesinde aǵymdaǵy jyly barlyq qarjy kózderinen 32 mlrd teńgeden astam qarjy bólý kózdelýde.
Aıta keteıik, qabyldanǵan qajetti sharalardyń alǵashqy nátıjeleri baıqalyp, bıylǵy jyly oblysta jumys istep turǵan kásipkerlik sýbektiler 11%-ke kóbeıip otyr. Atalǵan kórsetkish boıynsha naqty kezeńde Qyzylorda oblysy aımaqtar arasynda kósh bastap tur», - dedi oblys ákiminiń orynbasary Evgenıı Kım.
Qazir aımaǵymyzda shaǵyn jáne orta bızneste (ShOB) eńbek etip júrgender sany 83 144 jandy qurady. Jyl sońyna deıin olardyń qataryn 90 myńǵa jetkizý josparlanyp otyr.
Bıyl qaıtarymsyz grantqa joba usynǵandar qatary mol boldy. Konkýrstyq komıssııa jalpy quny 200 mln teńgeni quraıtyn 224 jobany maquldaǵan. Onyń 159-y jumyssyz turǵyndardyń jobasy bolsa, 22 joba múmkindigi shekteýli jandarǵa tıesili, 25-i - jastar, qalǵan 18-i startapshylar úlesinde. «Bastaý Bıznes» jobasy boıynsha bıylǵy jyly 1600 jandy oqytý kózdelse, búginge deıin 796 adam oqýdan ótken. Onyń 704-i jobalaryn qorǵaǵan. Al «Bıznes-keńesshi» jobasy boıynsha oqytylýǵa tıisti 1016 adamnyń 800-i oqýdan ótkizildi.
