Syr ónerpazdary Ázerbaıjan jerinde óner kórsetýde
QYZYLORDA. QazAqparat - Qazaqstan men Ázerbaıjan respýblıkalary arasyndaǵy dıplomatııalyq baılanystyń 25 jyldyǵyna oraı oblystyq teatr jáne fılarmonııa ujymdary Ázerbaıjan Respýblıkasynyń Baký jáne Shekı qalalarynda óner kórsetip jatyr. Bul týraly QazAqparat HAA tilshisi oblystyq mádenıet basqarmasyna silteme jasap habarlady.
Baýyrlas elmen mádenı baılanysty tereńdete túsýge baǵyttalǵan oblystyq ákimdiktiń bul bastamasyn Qazaqstannyń Ázerbaıjan respýblıkasyndaǵy elshiligi, ÁR mádenıet jáne týrızm mınıstrligi, TÚRKSOI uıymy qoldady.
Óner kúnderiniń ashylýy qarsańynda Qazaqstannyń Ázerbaıjan respýblıkasyndaǵy tótenshe jáne ókiletti elshisi Beıbit Isabaev oblys delegatsııasymen kezdesip, sáttilik tiledi.
Ótken jyly alys-jaqyn shet eldermen mádenı baılanysty nyǵaıtý maqsatynda oblystyq fılarmonııanyń «Tomırıs» bı ansambli Túrkııada, AQSh-tyń Nıý-Iork, Vashıngton qalalarynda ótken Naýryz merekesine qatysyp, óner kórsetken edi. Sonymen qatar osy óner ujymy el Táýelsizdiginiń 25 jyldyǵyna oraı Reseıdiń Orynbor qalasynda, Tashkentte, Batys Qazaqstan, Aqtóbe oblystary men Taraz qalasynda jáne arnaıy merekelik baǵdarlamalarmen eldi mekenderde gastroldik kontsertter uıymdastyrdy.
