Syr kúrishshileri oblys tarıhynda alǵash ret jarty mln tonnadan astam ónim jınady
QYZYLORDA. QazAqparat - Oblystyń úzdik dıhanshylaryn marapattap, egin jınaý naýqanyn qorytyndylaý maqsatynda uıymdastyrylatyn «Altyn dán-2017» saltanatty jıyny ótti, dep habarlady QazAqparat tilshisi.
Óńir tarıhynda alǵash ret astyq kólemi jarty mıllıonnan astam tonnany qurady. Ortasha eseppen kúrishtiń ár gektarynan 55,3 tsentnerden astyq jınaldy.
«Altyn dán-2017» saltanatty sharasy aıasynda oblys ákimi Qyrymbek Kósherbaev aýyl sharýashylyǵy salasynyń eńbek ardagerlerine Elbasy N.Nazarbaevtyń quttyqtaýyn jetkizdi.
Oblys ákimi ardagerlerge agrarlyq salada jetken jetistikteri týraly aıtyp, aldaǵy josparlarymen bólisti. Mysaly, agroónerkásiptik keshendi jáne eksport úlesin ulǵaıtý boıynsha júzge jýyq joba iriktelip alynǵan. Olar iske qosylǵanda eki myńǵa jýyq jańa jumys orny ashylady.
«Ótken aptanyń aıaǵynda men oblystyń delegatsııasyn basqaryp arnaıy Iran Islam Respýblıkasynyń Mazandaran jáne Gúlistan provıntsııalaryna saparmen baryp, ırandyq kásipkerlermen ırandyq kúrish sorttaryn oblysta óndirýdi qarjylandyrý jáne óndirgen ónimdi túgel Iranǵa eksporttaý jóninde uzaq merzimdi kelisimge keldik. Bıyl kúrishtiń alǵashqy 60 tonnasyn Iranǵa eksportqa jiberetin bolsaq, bolashaqta ırandyq kúrishti 5 myń gektarǵa egip, kem degende 10 myń tonna kúrish eksporttaý josparlanyp otyr. Keleshekte ırandyqtar 1 mln tonnaǵa deıin kúrishti Qyzylorda oblysynan alýǵa múddeli ekendikterin málimdedi», - dedi oblys ákimi.
Aıta keteıik, 2017 jyldyń 1 jartyjyldyǵynda aýyl sharýashylyǵy ónimderin eksporttaý 48,3 paıyzǵa ósti, al kúrishtiń eksporty 53 paıyzǵa artty. Reseılik kompanııalar shamamen 6 myń tonna kókónis jáne baqsha daqyldaryn satyp aldy. Sonymen qatar, 1944 bas qoı Iran Islam Respýblıkasyna jáne BAÁ jiberildi.
Úzdikter QR Aýyl sharýshylyǵy mınıstrliginiń jáne oblys ákiminiń alǵys hattarymen, medaldarymen marapattaldy.
Erteń Qyzylorda qalasynda barlyq aýdandardyń qatysýymen dástúrli aýyl sharýashylyǵy ónimderiniń jármeńkesi ótedi.
