Syr elinde aqyn, dramatýrg Iran Orazbaevtyń dramalyq dastany sahnalandy
Mereıli mereıtoıy qarsańynda jerlesterine «Máńgilik eldiń altyn adamy» dramalyq dastanynyń premerasyn tartý etken jazýshynyń shyǵarmashylyq keshinde oblys ákimi Nurlybek Nálibaev quttyqtady.
«Syr óńiri – Túrki áleminiń ańyzy, ortaq abyzy - Qorqyt babanyń, týǵan halqyna jeruıyq izdegen - Asan Qaıǵynyń, naızaly batyrlar men naızaǵaı aqyndardyń – Otany. Bul sapty qazaqtyń qabyrǵaly qalamgeri, Qazaqstan Respýblıkasynyń Memlekettik syılyǵynyń laýreaty, arqaly aqyn, daryndy dramatýrg, Syrdyń sańlaq perzenti – Iranbek Ábitaıuly jalǵaıdy.
Isi qazaqtyń súıiktisine aınalǵan zamanynyń zańǵary Muqaǵalı Maqataev týraly jazǵan qalamgerler kóp-aq. Biraq, aqynmen úzeńgiles júrip, tini úzilmes jyr jazǵan.
Iran-Ǵaıyptan basqany ataý qıyn. Óleń sózdiń shyn baǵasyn beretin halyq Iran-Ǵaıyp aqyndy Muqaǵalımen muńdas bolǵany úshin de kókke kóteretini ras.
Táýelsiz elimizde tuńǵysh ótken jazba aqyndar jyr-músháırasynyń Bas júldegeri bolýy da Iran-Ǵaıyptyń aqyndyq daryny men arynyn aıǵaqtaıdy. Kitaphanalar sóresinen oqyrman qolyna udaıy kóshetin aqyn óleńderi eń oqylymdy shyǵarmalar sanalady. Siz bir dáýir aqyndarynyń ustazyna aınaldyńyz. Sizdiń qazaq óleńine salǵan dara oljańyzben birge ulttyq dramatýrgııaǵa qosqan úlesińiz de erekshe zor», - dedi aımaq basshysy.
Keshte oblys ákimi Iranbek Ábitaıulyna QR Parlamenti Senatynyń tóraǵasy Máýlen Áshimbaevtyń quttyqtaýy men oblystyń eń joǵarǵy nagradasy Qyzylorda oblysynyń «Qurmet» gramotasyn tabystap, qazaqy dástúr boıynsha ıyǵyna shapan japty.
Saltanatty is-shara tárbıelik máni orasan, birlikke, yntymaqqa baýlıtyn «Máńgilik eldiń altyn adamy» dramalyq dastanynyń Syr sahnasyndaǵy tusaýkeser kórsetilimimen aıaqtaldy.
Aıta keteıik, búgin aqynnyń mereıtoıyna oraı N.Bekejanov teatrynda «Topyraǵyńdy basqanym - taý asqanym» atty shyǵarmashylyq keshi ótedi.
Iranbek Ábitaıuly (Iran Ǵaıyp) Orazbaev – QR Memlekettik syılyǵynyń jáne «Parasat» ordeniniń ıegeri, «Platınaly» Tarlan táýelsiz syılyǵynyń laýreaty.
2002 jyly «Qorqyttyń kóri» atty jyr kitaby úshin QR Memlekettik syılyǵynyń laýreaty atandy. Elimizde tuńǵysh ótken jazba aqyndar jyr-múshaırasynyń bas júldegeri. Aqynnyń «Júrek jyrlaıdy», «Túnniń kózi», «Ómir-óleń» syndy óleńder men poemalar jınaqtary jaryq kórdi.
Abaı ómiriniń sońǵy kózeńine arnalǵan «Men ishpegen ý bar ma?» atty dramalyq dastany, «Qorqyttyń kóri» tragedııalyq dramasy respýblıkalyq teatrlardy jáne N.Bekejanov atyndaǵy qazaq akademııalyq mýzykalyq drama teatrynda qoıyldy.
