Syr boıyndaǵy kooperatıvter et te, sút te óndiredi
QYZYLORDA. QazAqparat - Agrarlyq sektordy qazirgi zamanǵy jaǵdaıda damytýdyń tıimdi tásili aýylsharýashylyǵy kooperatıvterine birigý ekendigi belgili. Osy baǵytta jasalǵan jumystar nátıjesinde búginde aımaqta 223 aýyl sharýashylyǵy kooperatıvi qurylyp otyr. Bul týraly QazAqparat tilshisi oblystyq aýylsharýashylyǵy basqarmasyna silteme jasap habarlady.
Basqarmanyń esebine súıensek, bıylǵy alty aıda 514 jeke qosalqy sharýashylyqtyń birigýi arqyly 23 aýyl sharýashylyǵy óndiristik kooperatıvteri quryldy (20 et baǵytynda, 3 sút baǵytynda, 1 baqshalyq, sondaı-aq, «Aqmol» AÓK - sút jáne et baǵytynda jumys jasaıdy).
Qurylǵan kooperatıvterdi qarjylandyrý «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda osy jylǵa bólingen 1765 mln. teńge qarjy esebinen júzege asyrylady.
Búgingi kúni «Aýyl sharýashylyǵyn qarjylaı qoldaý qory» AQ Qyzylorda fılıaly arqyly 15 kooperatıv 1 057,0 mln.teńge qarjyǵa 6797 bas iri qara alǵan.
Nátıjesinde, búgingi kúni 274 otbasylyq mal bordaqylaý alańdary qurylyp, 4836 bas múıizdi iri qara maly bordaqylanýda. Sonymen qatar, 1961 bas sıyr satyp alynyp, 85 shaǵyn otbasylyq sút fermalary quryldy. Búgingi kúnge qurylyp, nesıe alǵan kooperatıvter 160 tonna et, 40 tonnaǵa jýyq sút óndirdi.
Memlekettiń arnaıy baǵdarlamalary arqyly qoldaý taýyp otyrǵan et jáne sút óndirisi Elbasynyń «Ult jospary bes ınstıtýtsıonaldyq reformany júzege asyrý jónindegi 100 naqty qadam» atty basty qujattyń 60-61 qadamdarynda: Sút jáne sút ónimderi óndirisin damytý úshin strategııalyq ınvestorlar tartý kerektigi basa aıtyldy. Negizgi mindet: úsh jyl merzimde TMD elderi naryǵyna shyǵarylatyn ónimderiniń jartysyna deıingi eksportyn qamtamasyz etý mindeti qoıyldy.
