Syr boıynda kúrish egý tolyǵymen aıaqtaldy
QYZYLORDA. QazAqparat - Oblysta negizgi daqyl - kúrishti egý, sýǵa bastyrý jumystary tolyǵymen aıaqtaldy. Bul týraly oblys ákimi Q.Kósherbaevtyń tóraǵalyǵymen ótken jıynda aıtyldy, dep habarlady oblys ákimdiginiń baspasóz qyzmetinen.
Aýa raıynyń keıbir qıyndyqtaryna qaramastan, oblys dıqandarynyń zor eńbeginiń jáne memleket tarapynan kórsetilgen qoldaýdyń arqasynda kúrish daqylyn egýdiń agrotehnıkasy tolyq saqtalyp, jospardaǵy 76639 gektardyń ornyna barlyǵy 80694 gektar kúrish egildi. Ótken jylmen salystyrǵanda, kúrish egisi 6,7 myń gektarǵa artyq egilip otyr.
Onyń basty sebepteriniń biri kúrish egetin sharýashylyqtardy aldyn-ala nesıelendirýge bıylǵy jyly qol jetkizildi. Oblys ákiminiń tikeleı qoldaýynyń arqasynda, oblystaǵy aýyl sharýashylyǵy qurylymdarynyń kúzde jınalatyn kúrishiniń 1 kelisin 50 teńgeden satyp alý jónindegi sheshim bıylǵy jyly osynshama kúrish daqylyn egýge oń yqpalyn jasady. ıAǵnı, dıqan qaýymynyń kúrish óndirisimen shyndap aınalysýǵa degen yntasyn nyǵaıtty. Atap aıtqanda, oblystyń kúrish sharýashylyqtarynan kúrish salysyn aldyn-ala satyp alýǵa nesıe qarastyrylyp, ústimizdegi jyly «Agro Holdıng Baıqońyr» JShS arqyly 42 sharýashylyqqa kúzgi eginnen jınalatyn kúrish salysyn satyp alý jónindegi kelisim-shart negizinde kóktemgi egin egý jumystaryn júrgizýge barlyǵy 772,4 mln. teńge qarjy berildi.
Aýdan ákimderi men aýyl jáne sý sharýashylyǵy mamandarynyń habarlamalaryn tyńdaǵan oblys ákimi aldaǵy ýaqytta egilgen kúrishti agrotehnıkalyq sharalarǵa saı kútip baptaý qajettigine toqtaldy. Sonymen qatar egilgen egisti sýarmaly sýmen qamtamasyz etýde tıisti sala mamandaryna tapsyrma berdi.
Aldaǵy ýaqytta eginshilik salasyn ártaraptandyrý baǵytyndaǵy máselelermen qatar, bolashaqtaǵy basty mindetterdiń biri - ol kúrish daqylynyń kólemin kóbeıtý emes, ozyq tájirıbelerdi qoldaný arqyly ónimdilikti molaıtý qajettigine oblys ákimi májiliske qatysýshylardyń nazaryn aýdaryp, eginshilikke qatysty jer tegisteý, sýarmaly sýdy tıimdi paıdalaný jóninde semınar-keńester ótkizýdi tapsyrdy.
