Syr boıylyq jas boksshylar ózara kúsh synasýda
QYZYLORDA. QazAqparat-Qyzylorda oblysyndaǵy irgeli oqý ordasy, bilim men ǵylymnyń, mádenıettiń qarashańyraǵy Qorqyt Ata atyndaǵy Qyzylorda memlekettik ýnıversıtetine bıyl - 80 jyl.
Osyǵan oraı, 31 naýryz kúni aımaqtaǵy joǵary, tehnıkalyq jáne kásiptik bilim berý uıymdarynyń stýdent-jastary arasynda bokstan ýnıversıtettiń ashyq birinshiligi bastaldy, dep habarlady QazAqparat HAA tilshisi.
Týrnırdiń qadirli meımany - Qazaqstan Respýblıkasynyń eńbek sińirgen jattyqtyrýshysy, Sıdneı Olımpıadasynyń Halyqaralyq dárejedegi AIBA tóreshisi, «Qurmet» ordeniniń ıegeri, QR Olımpıada rezervin daıarlaý ortalyǵy dırektorynyń keńesshisi Serik Ábdenalıev.
Ýnıversıtettiń oqý isi jónindegi prorektory, birinshi prorektory Abaıbek Júnisov jarys jolyndaǵy azamattarǵa sáttilik tiledi.
Boksshylar 8 salmaq dárejesi boıynsha synǵa túsetin bolady. Spartakıadaǵa barlyǵy 9 komanda qatysýda. Olar, atap aıtsaq, Qorqyt Ata atyndaǵy Qyzylorda memlekettik ýnıversıtetiniń komandasy; «Bolashaq» ýnıversıteti men «Bolashaq» kolledjinen quralǵan qurama komanda; «Aqmeshit» gýmanıtarlyq-tehnıkalyq ınstıtýty men Qyzylorda kópsalaly gýmanıtarlyq-tehnıkalyq kolledjinen quralǵan qurama komanda; M.Mámetova atyndaǵy Qyzylorda gýmanıtarlyq kolledjiniń komandasy; I.Ábdikárimov atyndaǵy Qyzylorda agrotehnıkalyq kolledjiniń komandasy; Qyzylorda medıtsınalyq kolledjiniń komandasy; Qazaq gýmanıtarlyq, zań jáne tehnıkalyq kolledjiniń komandasy; Qyzylorda qurylys jáne bıznes kolledjiniń komandasy jáne «Abylaı han» kolledjiniń komandasy.
Týrnır 2 sáýirge deıin jalǵasady.
