Sypaıylyq, eńbeksúıgishtik, jiger: Elorda áýejaıy klınerleri qalaı jumys isteıdi
NUR-SULTAN. QazAqparat – Tazalyq – densaýlyq kepili ári kez kelgen ǵımaratta minsiz jaǵdaı jasaıtyn adamdar jumysynyń kórsetkishi. Dál sol adamdar ǵımarattyń taza ári jaıly bolýy úshin bar kúsh-jigerlerin jumsaıdy. Olar aıazdy kúnderi de, jaýyn-shashyn ýaqytynda da ǵımarattyń tazalyǵyn qamtamasyz etedi. Sondyqtan klıner jumysy óte aýyr jáne sypaıylyqty, eńbeksúıgishtikti, jigerlilikti, uqyptylyqty, tártipti talap etetini belgili. Osy oraıda QazAqparat tilshileri Nursultan Nazarbaev halyqaralyq áýejaıynda bolyp, áýe aılaǵynyń tazalyǵyn qamtamasyz etetin 124 adamnyń jumysymen tanysqan bolatyn.
Áıelder merekesi qarsańynda áýejaıda 6 jyl boıy klıner bolyp eńbek etip kele jatqan Záýresh Omarovany sózge tarttyq.
«Sizderdiń aldaryńyzda taǵy bir jýrnalıst kelip ketken bolatyn. Bizge suhbat berý yńǵaısyzdaý ári ádettenbegen dúnıemiz. Bizdiń jumysymyz qarapaıym ǵana ǵoı»,- dedi ol.
Záýresh Omarova tańǵy saǵat 8:00-de aýysymǵa túsedi.
Ol basshylyqqa tańerteń qansha adam jumysqany kiriskeni týraly fotoesep jibergennen keıin barlyq klınerler ózderine bekitilgen aýmaqty tazalaý jumysyna kirisedi.
Olar kúni boıy ǵımarattyń ishin tazalaıdy. Al ol ońaı jumys emes. Óıtkeni, elorda áýejaıyna kúnsaıyn 10 myńnan astam adam kelip, ketip jatady.
«Árıne, jolaýshylar ártúrli. Onyń ústine áýejaı – bul túrli adamdardyń joly toǵysatyn jer. Biraq, biz árbir jolaýshynyń kóńilinen shyǵyp, tazalyqty qamtamasyz etýge tyrysamyz. Jolaýshylarmen janjaldasýǵa jol bermeımiz ári bárimen sypaıy sóılesemiz. Óıtkeni, olar jol júrip bara jatyr. Jolaýshylarǵa da óz reısterin taza ǵımaratta kútý de jaǵymdy áser qaldyrady ǵoı. Bul bizdiń jumysymyzdyń kórsetkishi de», - dedi klıner.
Onyń buǵan deıingi jumys ornynda tólenetin jalaqy tómen bolatyn. Sondyqtan elorda áýejaıyna jumysqa ornalasty.
Qazirgi jalaqysy kóńilinen shyǵady ári ýaqyty alady. 15 kún jumys istep, 15 kún demalady.
Klınerler áýejaıdy tazalaý barysynda eden jýatyn mashınany qoldanady. Mashına táýligine úsh ret ǵımaratty tazalap shyǵady.
Sonymen qatar klınerler ár 20 mınýt saıyn baspaldaqtyń jaqtaýlaryn súrtip alady.
«Eshandaı qıyndyq baıqamadym. Qaıta jumysym ózime unaıdy. Tipti, mereke kúnderin jumysta qarsy alatyn kezderimiz bolady. Basshylyqtan quttyqtaý, alǵys hatalyp jatamyz. Olardyń bizdi nazardan tys qaldyrmaıtyny súısindiredi», - dedi Zaýresh Omarova.
Ol ótken jyly áıelder merekesin jumysta qarsy aldy. Ujymdastarymen merekelik dastarhan jaıyp, bir-birine shynaıy yqylastaryn bildirdi. Al bıyl ol merekeni otbasylyq dastarhan basynda qarsy alady.
«Barlyq áıel zatyn merekemen quttyqtaǵym keledi. Aspanymyz ashyq, elimiz tynysh bolsyn! 8 naýryzdy úıde, otbasymnyń ortasynda qarsy alamyn. Jyl saıyn balalarymnyń, nemerelerimniń quttyqtaýy dástúrge aınalǵan, nazardan tys qaldyrmaıdy. Áıel úshin baqyt degenimiz ne? Árıne, balalardyń, otbasynyń amandyǵy. Sizderge de sony tileımin!», - dedi Záýresh Omarova.
