Synyptastaryn baltamen jaraqattaǵan petropavldyq oqýshy nege úıden oqymady

ASTANA. QazAqparat – Oqý-aǵartý mınıstrligindegiler Petropavl qalasyndaǵy mekteptesterin jaraqattaǵan balanyń nege psıhologııalyq jaǵdaıyna baılanysty úıden oqymaǵanyn túsindirdi, dep habarlaıdy QazAqparat tilshisi.

«Psıhologııalyq jáne is-árekettegi aýytqýlar úıden oqý qarastyrylǵan aýrýlar tizimine engizilgen (QR DSM-34 buıryǵy). Sonymen birge, Soltústik Qazaqstan oblysy bilim basqarmasynyń aqparaty boıynsha, oqýshynyń ata-anasy bilim mekemesine dárigerlik-konsýltatsııalyq komıssııanyń qorytyndysyn usynbaǵan», - dep jazylǵan QazAqparattyń saýalyna joldanǵan jaýapta.

Sondaı-aq, mınıstrlik mamandary «Bilim týraly» QR Zańynda árbir adam zııatkerlik damýyna, psıhıkalyq-fızıologııalyq jáne jeke erekshelikterine qaramastan bilim berýdiń búkil deńgeıine qol jetkizýge quqyly ekenin eske salady.

Jaýapta balanyń aýrýy bar-joǵy anyqtalǵan kezde ony úıde oqytýǵa dárigerlik-konsýltatıvtik komıssııa (DKK) jiberetini, bul norma «Dárigerlik-konsýltatıvtik komıssııanyń qyzmeti týraly erejeni bekitý týraly» QR Densaýlyq saqtaý mınıstriniń 2022 jylǵy 7 sáýirdegi №34 buıryǵynda kózdelgeni aıtylǵan.

Eske salsaq, aqpan aıynda Petropavlda 9-synyp oqýshysy mektepke qarýlanyp kelip, birneshe balany jaraqattaǵan edi.