Synaqtar men oryn alǵan olqylyqtarǵa súıený ádisi bizdi alǵa jyljytpaıdy - N. Nyǵmatýlın
ASTANA. 13 aqpan. QazAqparat - Búgin Májiliste «Qazaqstan Respýblıkasynyń keıbir zańnamalyq aktilerine memlekettik-jeke menshik áriptestiktiń jańa nysandaryn engizý jáne olardyń qoldanylý salalaryn keńeıtý boıynsha ózgerister men tolyqtyrýlar engizý týraly» zań jobasy keńinen talqylanyp, birinshi oqylymda maquldandy.
Depýtattardyń belsendi talqylaýynan soń, sózge aralasqan spıker N. Nyǵmatýlın, kez kelgen memlekette ekonomıkany damytý kezeń-kezeńimen júzege asatynyn tilge tıek etti. «90-shy jyldardyń óz qıyndyǵy boldy, tipti elimizdiń qarapaıym qarjy júıesin qalyptastyrý mindetin sheshý kún tártibinde turdy. Sosyn baryp barlyq bıýdjet qyzmetkerlerin jalaqymen qamtamsyz etý máselesi kóldeneńdedi, damý, óndiristi ártaraptandyrý kezeńi de boldy. Endigi kúni jańa damý - memlekettik-jeke menshik áriptestik formasy aldynda tur. Bunda áriptestik máselesi ǵana emes, ony keńeıtý de ózekti. Endeshe, bundaı aýqymdy jumysta arnaıy zań qabyldamaı, qur qaıtalanǵan synaqtar pen kemshilikterge súıenip alǵa jyljý - bul eń tıimdi nusqa emes», - dedi Májilis tóraǵasy.
Sonymen qatar, zań jobasyn áli de pysyqtaı túsý qajettigine toqtalǵan ol «áli kúnge deıin jaqsy jazylǵan zańdardyń keıinnen durys zań aktileriniń bolmaýynan, ony oryndaýǵa jaýaptylyqtyń joqtyǵynan «aqsap» qalatynyna» keıistik bildirdi.
«Bul rette bizge eń aldymen, memlekettik-jeke menshik áriptestik formasyna kóbirek úńilý qajet shyǵar. Osy úshin bıznes-qaýymdastyqty tarta otyryp, zań jobasyn ekinshi oqylymda keńinen talqylaýǵa bolady. Biz buǵan daıynbyz. Zańdy shynaıy ómirge barynsha jaqyndatýǵa tıispiz, óıtkeni bunymen memlekettik ınstıtýttar ǵana emes, eń bastysy bıznes-qaýymdastyq jumys isteıtin bolady», - dedi spıker.
