Syn-tegeýirinder memlekettiń ál-aýqaty úshin qaýipti bola túsýde – Prezıdent
NUR-SULTAN. QazAqparat – Syn-tegeýirinder memlekettiń ál-aýqaty úshin qaýipti bola túsýde. Bul týraly Qazaqstan halqy Assambleıasynyń HІH sessııasynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Jahandyq álem qarqyndy túrde ózgeriske ushyrap, teńdessiz transformatsııa kezeńine tap boldy. Saıasat pen ekonomıkada, qoǵamdyq ómir men tehnologııalyq damýda múldem jańa shynaıylyq týyndap keledi. Jer sharynyń túrli óńirinde dinı alaýyzdyq ýshyǵyp, ksenofobııalyq kóńil-kúı baıqalyp otyr»,- dedi QR Prezıdenti.
Memleket basshysynyń atap ótýinshe, bul syn-tegeýirinder memlekettik ál-aýqat úshin ásirese koronavırýstyń jappaı taralýy jaǵdaıynda barynsha qaýipti bola túsýde.
«Álemdegi geosaıası turaqsyzdyq aıasynda Qazaqstan beriktiktiń naqty qoryna ıelik etip otyr. Bul - halyqtyń kelisimi men birligi, bul - ekonomıkamyzdyń áleýeti. Elbasy qalyptastyrǵan qarjylyq múmkindikterge, qarjylyq áleýetke arqa súıeı otyryp, úkimet adamdardyń óte úlken sanyna – 4,5 mıllıonnan astam adamǵa teńdessiz materıaldyq kómek kórsete aldy», - dedi Qasym-Jomart Toqaev.
