Syn saǵatta balanyń kóńilin aýlaı bilý kerek – 40-tan astam balaǵa kómekke kelgen qutqarýshy

ÓSKEMEN. QazAqparat – Adam janyn ajaldan arashalap, qandaı da bir qıyndyqqa tap bolǵandarǵa kómek qolyn sozý – qutqarýshylardyń mindeti. Osy mindetti abyroımen atqaryp júrgenderdiń biri – Arnat Qasenov. ShQO Tótenshe jaǵdaılar departamenti mamandandyrylǵan jasaǵynda ter tógip júrgen ony áriptesteri «Balalar qutqarýshysy» dep atap ketken. QazAqparat tilshisi Otan qorǵaýshy kúnine oraı burynǵy Marqakól aýdanynyń týmasymen suhbat qurǵan bolatyn.

- Qutqarýshy bolyp qyzmet etip kele jatqanyńyzǵa qansha ýaqyt boldy?

- Bıyl 13 jyl tolyp otyr. Mektep bitirgennen keıin áskerge attanyp, odan soń 2 jyl áskerı salada qyzmet etkenim bar. 2009 jyly qutqarýshy bolyp jumysqa ornalasyp, mine sol ýaqyttan beri úzdiksiz jumys istep kelemin.

- Bul salany tańdaýyńyzǵa ne sebep?

- Bala kúnnen basqaǵa kómektesýdi qalaıtynmyn. Ákemniń sińirgen tárbıesi solaı. Asqar taýym aınalasyndaǵylarǵa árkez kómek qolyn sozyp júretin. Osyny kózben kórip, sanamyzǵa túıip óstik. Sodan keıin qutqarýshy atandym. Áli kúnge deıin qyzmetimnen jalyǵyp, sharshap kórgen emespin.

- Qaýyrt qyzmetterińizdegi eń qıyny ne?

- Menińshe, jol-kólik oqıǵalaryna barǵan kezde qıyndaý. Sebebi apatqa tap bolǵan adamdardy kórgenniń ózi aýyr. Olardyń qystyrylyp qalǵan qol-aıaǵyn shyǵarǵanda barynsha abaı bolý qajet.

Órtten adamdardy qutqarý da ońaı sharýa emes. Aınalany tumshalaǵan kók tútinnen eshteńe kórinbeı jatady. Adamdardy aman alyp qalý úshin ár sekýndtyń mańyzy zor.

Birde Óskemendegi Krylov kóshesinde ornalasqan kópqabatty úıdiń tórtinshi qabatyndaǵy páterde órt shyqqan edi. Birden sol jerge attandyq. 2 bala ishte qalyp qalypty. Tynys alatyn «Drager» atty apparatty kıip, ishke kirdik. Qasymdaǵy áriptesim ekeýimiz balalarǵa maska kıgizdik te syrtqa alyp shyqtyq.

- Ózińizdiń balalardy jıi qutqaratynyńyzdy estidik. Áriptesterińiz sizdi «Balalar qutqarýshysy» dep te atap ketipti.

- Iá. Osy ýaqytqa deıin 40-tan astam balaǵa kómekke kelippin. San alýan jaǵdaılar boldy. Búldirshinder bastaryn, qol-aıaqtaryn túrli jerlerge qystyryp alady, qudyqqa qulap ketedi, úıde qamalyp qalady. Balalar oınap júrip bir jerge tyǵylyp, sodan shyǵa almaı qalǵan sátter jıi kezdesedi. Odan keıin jańa aıtqanymdaı, otqa oranǵan úılerden balaqaılardy qutqaryp jatamyz.

Bir qıyny, balalar jylap, qaı jerleri aýyryp turǵanyn aıta almaıdy. Keıde tipti qastaryndaǵy ata-anasynyń ózi botadaı bozdap turady. Balalardy tynyshtandyryp, sózge tartyp, amalyn taýyp kómektesýge tyrysamyz. Bári sátti aıaqtalǵan soń olardyń qýanyshtaryn kórý – úlken baqyt. Shynaıy alǵystaryn bildirip jatqanda kókiregimdi erekshe sezim kerneıdi.

Jumystaǵy áriptesterime rahmet! Qandaı oqıǵa bolmasyn bir-birimizben aqyldasyp, túsinisip áreket etemiz. Men bireýdi qutqarsam, qasymdaǵy jigitterdiń kómeginiń, demeýiniń arqasy dep bilemin.

- Áńgimeńizge kóp rahmet!