Syn-pikirdi fýtbolshylarǵa emes, maǵan aıtsyn - «Tobyldyń» bas bapkeri

NUR-SULTAN. QazAqparat – Qostanaılyq «Tobyl» fýtbol klýbynyń bas bapkeri Aleksandr Moskalenko fýtboldan Qazaqstannyń sýperkýbogy aldynda BAQ ókilderiniń saýaldaryna jaýap berdi, dep habarlaıdy QazAqparat tilshisi.

«Bizdiń komanda erteńgi matchtyń mańyzyn túsinedi degen oıdamyn. Ózderiniń myqtylyǵyn dáleldep, jaqsy oıyn bolýy kerek. Fýtbolshylardyń arasynda jaraqat alǵandar bar, biraq asa qaýip joq. Komanda quramy tolyq, erteńgi jarysqa daıynbyz. Ózderińiz biletindeı, Qazaqstanda shabýylshy fýtbolshylar tapshy. Qaqpashylarǵa kelsek, bizde olar úsheý jáne úsheýiniń de kásibı daıyndyǵy joǵary. Qazir fýtbol klýbtaryn qarjylandyrýǵa ózgeris engizdi. Shekteý qoıyldy, qarjy bólýde biz belgilengen shekten aspaýymyz kerek», - dedi «Tobyl» fýtbol komandasynyń bas bapkeri Aleksandr Moskalenko «Astana Arena» kesheninde ótken baspasóz máslıhatynda.

Sondaı-aq, bas bapker «Tobyl» komandasynyń oıyn kórsetkishi týraly jankúıerlerdiń synyna qatysty pikir bildirdi.

«Jankúıerlerdi túsinemin, olardyń jany ashıdy. Biraq, syn-pikir men kemshilikterdi fýtbolshylarǵa emes, maǵan siltesin. Komandanyń daıyndyǵy men oıyn nátıjesine men jaýap beremin. Fýtbolshylar komandanyń atynan jaýap bermeıdi. Taǵy bir mańyzdy jaıt, komanda bir fýtbolshyǵa májbúr bolmaýy tıis. ıAǵnı, myqty fýtbolshy ketkenniń ózinde komanda abyroıyn qorǵaýdy odan ári jalǵastyrady. Basqa fýtbolshy tabylady. Erteń baǵymyz synalady, jaýapty kún», - deıdi ol.

Qazir «Tobyl» fýtbol klýbynyń oıynshylary elordadaǵy «Astana Arena» sport kesheninde jattyǵý ótkizip jatyr.

Aıta keteıik, erteń «Tobyl» men «Qaırat» fýtbol komandasy Qazaqstannyń sýperkýbogy úshin baq synasady.

Fýtbol oıyny «Astana Arena» sport kesheninde keshki saǵat 19:30-da bastalady.