Syltaý aıtyp, aýyldaǵy mektepterdi jaba bergendi toqtatý kerek - Ońdasyn Orazalın
AQTÓBE. QazAqparat –Aqtóbede «Bilim jáne ǵylym» tamyz konferentsııasy ótti. Jıynǵa qatysqan oblys ákimi bilim salasyndaǵy birqatar problemalardy tizbektedi, dep habarlaıdy QazAqparat tilshisi.
Aqtóbelik ustazdar jańa oqý bastalar shaqta Óner ortalyǵyna jınalyp, ótken jyly atqarylǵan, alǵa qoıǵan maqsattarmen tanysty. Jıynǵa óńir basshysy Ońdasyn Orazalın qatysyp, birqatar tapsyrmalar júktedi.
«Barlyq aýdan boıynsha pedagogtarymyzdyń 35-40 paıyzy ulttyq biliktilik testileýinen ótpeı qalyp, qaıta tapsyrýyn qalaı túsinýge bolady?! Óz bilimin jetildire almaǵan pedagog maman oqýshylaryna qandaı bilim beredi? Osyǵan baılanysty talapty kúsheıtýdi tapsyramyn. Ári muǵalimderdiń biliktiligin arttyrýǵa jaǵdaı jasaýymyz kerek. Tipti fızıka, hımııa sekildi pánnen sabaq beretin muǵalimder óz salasy boıynsha úzdik bolǵanymen aǵylshyn tilin bilmeıdi. Múmkin birqatar pedagogtyń bilimin shetelde jetildirý kerek shyǵar. Bul nazarda bolýy kerek. Ýnıversıtetpen birigip, shetelden maman shaqyrýǵa da bolady», - dedi oblys ákimi O.Orazalın.
Sonymen qatar jıynda Shalqar, Oıyl, Alǵa aýdandarynan dırektor laýazymyna kelgen birqatar úmitkerler birneshe ret komıssııadan ótpeı qalyp, qaıtadan 5-6 ret konkýrstan ótpek bolǵany aıtyldy.
«Eger basshylyq laýazymdaǵy qyzmetker bola tura tıisti deńgeıdegi talaptarǵa jaýap bere almasa, bilimi jetpeı jatsa, ne úmit, ne qaıyr?! Ókinishke qaraı, birneshe jyl boıy bir orynda tapjylmaı otyrǵan, jetistikke jetpegen dırektorlar da bar. Jeke bastyń emes, halyqtyń múddesi basym bolýy kerek. Aýdan ákimderi saýaty jetpeıtin adamdardy qaıta-qaıta jibermeı, laıyqty kandıdat tańdaýǵa basa nazar aýdarýy tıis», - dedi ákim.
Óńirde 20-dan astam mekteptiń qurylysy júrip jatyr. Basym bóligi bıyl qoldanysqa beriledi. Alaıda qurylysy uzaqqa sozylǵan mektepter bar. Olar Oıyl, Baıǵanın, Yrǵyz aýdandarynda bar. Al Muǵaljar aýdanyndaǵy №2 mektep, Embi orta mektebine ýaqytyly qarjy bóligenimen, jóndeý jumysy qazan aıynda aıaqtalady. Al jańa oqý jyly birer kúnde bastalady. Endi aýdan ákimi men basqarma basshysy birigip, jumystyń aıaqtalýyn, jaýapqa tartylatyndar týraly óńir basshysyna esep berýi tıis.
«Aýyldarda shaǵyn mektep bar. Mektep - sol aýyldyń júregi. Eger mektep jabylyp qalsa, aýylǵa qaýip tónedi. Sondyqtan syltaý aıtyp, mektepterdi jaba berýdi toqtatý kerek. Mektepti jabý ońaı, qaıta ashý qıyn. Kóp adam «mektep jabylmasa» dep tilek aıtady. Kásipkerler adamdardy kóshirip alsa, mektepter saqtalady», - dedi oblys basshysy.
Aıta keteıik, tamyz konfrentsııasynda QR Bilim jáne ǵylym mınıstrligi tarapynan 2 ardager ustaz «Eńbek ardageri», 8 pedagog «Ybyraı Altynsarın» jáne 8 ustaz «Bilim berý isiniń qurmetti qyzmetkeri» tósbelgilerimen marapattaldy. Oblys ákimi 21 pedagogtyń árqaısysyna 100 myń teńge kólemindegi syıaqy jáne alǵys hat, «Orta bilim beretin úzdik uıym» grantyn berýge arnalǵan konkýrstyń jeńimpazdaryna 3 mln 758 myń teńge men 8 mln teńge aralyǵyndaǵy sertıfıkatty tabys etti.
