Syǵanaqty zertteýge ózbek arheologtary da qyzyǵýshylyq tanytty
Bul is-sharalar Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda qolǵa alynyp otyr.
Syǵanaq qalashyǵyn jan-jaqty zerdeleý sharalaryna Túrkistan qalasyndaǵy halyqaralyq qazaq-túrik ýnıversıtetiniń arheologııalyq zertteý ınstıtýty ǵalymdary belsendi túrde atsalysyp keledi. Ýnıversıtet arheologtary 2003 jyldan beri bul baǵytta kóptegen jumystardy júzege asyrdy. Búgingi kúnge deıin ótken kúnderdiń belgisi retinde kóptegen kóne jádigerler qolǵa tústi. Ǵalymdar eski kezeńnen syr shertetin san alýan sándi ǵımarattardyń ornyn tapty.
Ǵalymdardyń aıtýynsha, bul qalashyq ornynan qumyra, aqsha, syrǵa, júzik jáne súıekten jasalǵan buıymdar shyqqan. Sondaı-aq, munda turǵan adamdar oınaǵan asyqtar da qolǵa ilindi. Bir orynnan 30-40 asyq tabyldy. Sonymen qatar, qazba jumystary barysynda Syǵanaqtyń ornalasý jaǵdaıy da anyqtalyp jatyr. Nátıjesinde ǵalymdar kóne shahardyń shyǵys qaqpasynyń ornyn anyqtady.
«Syǵanaq qalashyǵy UNESCO-nyń Dúnıejúzilik muralarynyń aldyna ala tizimine engizilgeni belgili. Búginde kóne qalashyqty týrızm ornyna aınaldyrý baǵytynda nátıjeli jumystar atqarylyp keledi. Syǵanaqtyń aýmaǵy qorshaldy, munaraly qaqpasy men qorǵan qabyrǵalarynyń birqatar bóligi 3 metr bıiktikke deıin qalpyna keltirildi. Osynyń nátıjesinde shamamen H ǵasyrdan bastap tarıhtan belgili qala ashyq aspan astyndaǵy murajaıǵa anıaldy. Bıyl bizdiń zertteý jumystarymyzǵa ózbek áriptesterimiz de atsalysyp otyr», - dedi Túrkistan qalasyndaǵy halyqaralyq qazaq-túrik ýnıversıtetiniń arheologııalyq zertteý ınstıtýtynyń aǵa ǵylymı qyzmetkeri Mels Baqytbaev.
Syǵanaqty zertteý sharalaryna Ózbekstannyń Samarqand qalasyndaǵy Orta Azııa zertteýler halyqaralyq ınstıtýty ǵalymdary keldi. Olar qazaqstandyq áriptesterimen birge Syǵanaqty jan-jaqty zertteýge nazar aýdaryp otyr.
Budan buryn Jankent qalashyǵy týrıstik nysanǵa aınalatynyn habarlaǵan edik.
