Syǵanaq qalashyǵy týrıstik nysan retinde ashyldy

QYZYLORDA. QazAqparat -Qyzylorda oblysy Jańaqorǵan aýdanynda ornalasqan Syǵanaq qalashyǵy týrıstik nysan bolyp ashyldy, dep habarlaıdy QazAqparat tilshisi.

Qaıta qalpyna keltirý sharalary júrgizilgen Syǵanaq endi alys jáne jaqynnan keletin jıhankezderdi tartatyn tarıhı-mádenı ortalyqqa aınalmaq. Oblystyq máslıhat hatshysy Naýryzbaı Baıqadamov kóne qalanyń týrızm nysany retinde ashylý saltanatynda osylaı dedi.

«Syǵanaq bizdiń tarıhymyzda aıryqsha oryn alady. Sondyqtan bizdiń halqymyz bul shahardy erekshe qurmet tutady. Bul shara ótken tarıhty baǵalaı otyryp, ony urpaq sanasyna sińirýde óz septigin tıgizedi», - dedi N.Baıqadamov.
 

Oblystyq tarıhı jáne mádenı eskertkishterdi qorǵaý ortalyǵynyń mamandarynyń aıtýynsha, kóne qala ornynda arheologııalyq qazba sharalary júrgizildi.

Sonymen qatar, onda 3 kezeńdik qaıta qalpyna keltirý júzege aspaq. Alǵashqy kezeńi boıynsha sáýirden  tamyzǵa deıin qajetti jumystar jasaldy. Qum astyndaǵy qazynalarǵa jiti nazar aýdarǵan zertetýshiler bul qalada VI-VII ǵasyrlarda tirshilik qaınap turǵanyn aıtady. Sondaı-aq, burynnan aıtylyp júrgen Aq Ordanyń ortalyǵy bolǵan tusta onda teńge soǵylǵan degen derek te tolyq dáleldene bastady.

Syǵanaq qalashyǵyndaǵy shyǵys qaqpasynyń eki jaq úlken qamaly bar. Qaıta qalpyna keltirý sharalary barysynda sol qamal 3 metrge deıin kóterilip, qaqpanyń ózin 1,5 metrge deıin bıiktetildi.
 

Restavratsııalyq sharalarǵa jáne arheologııalyq qazba jumystaryna respýblıkalyq jáne oblystyq bıýdjetten  qarjy bólindi.

Aldaǵy ýaqytta  Qyzylorda oblysynda ornalasqan Syǵanaqpen birge Shirik-Rabat, Jankent shaharlaryna servıstik ınfraqurylym júrgiziledi. Bul shaharlar ejelgi túrki taıpalarynyń astanalary retinde týrıstik klaster jasalady.

Esterińizge sala ketelik, budan buryn Syǵanaq qalashyńynyń ortaq bóligi qalpyna keltirip jatqanyn habarlaǵan edik. Sondaı-aq, atalmysh shahardyń etnotýrızm ortalyǵyna aınalatyny jóninde aıtqan bolatynbyz.