Sydyqov EUÝ-nyń damý strategııasyn jarııa etti
ASTANA. QazAqparat - Búgin halyq aldyndaǵy eseptik kezdesýin ótkizgen L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov elimizdegi basty bilim ortalarynyń biriniń aldynda turǵan negizgi mindetterdi atady, dep habarlaıdy QazAqparat.
«Biz óz strategııamyzda ulttyq zertteý ýnıversıteti mártebesin alýǵa umtylatynymyzdy jarııaladyq. Búgingi kúni damýdyń jańa kezeńine qadam basatynymyzdy resmı túrde málimdegim keledi. Bul neni bildiredi? Elbasynyń 2001 jyly 5 shildedegi Jarlyǵyna sáıkes, Eýrazııa ulttyq ýnıversıteti óz aıryqsha mártebesi boıynsha bilim berý qyzmetiniń mazmunyn derbes anyqtaı alatyn. Qazir talap ta, talǵam da ózgerdi. Biz muny jaqsy bilemiz! Kásibı biliktilik maqsaty men jumys berýshilerdiń múddesi - árqashan bizdiń oıymyzda. «Ortalyq Azııada bilim berý habyn damytý jáne ǵylymdy jańǵyrtý» baǵdarlamasy aǵylshyn tildi baǵdarlamalardy kúsheıtti. Sonyń nátıjesinde sheteldik professorlar men stýdentterdiń qyzyǵýshylyǵy artty», - dedi Erlan Sydyqov.
Osy rette ol EUÝ-dyń ulttyq zertteý ýnıversıtetine kóshýdegi perspektıvalarǵa toqtaldy. Onyń aıtýynsha, qos dıplomdy baǵdarlamalardy halyqaralyq deńgeıge kóterý sheteldik stýdentterdi tartýǵa ıgi yqpalyn tıgizedi. Magıstratýra men doktorantýrada oqıtyndardyń qatary kóbeıedi. Bul - zertteý ýnıversıtetiniń mańyzdy sıpattarynyń biri.
«Alda negizgi mamandyqtar boıynsha kadrlardyń biliktiligin arttyrý men qaıta daıarlaýdyń kóp satyly baǵdarlamalaryn júzege asyrý mindeti tur. Sonymen qatar, zertteý ýnıversıteti birinshi kezeńde jańa bilim áleýetin qalyptastyryp, ulttyq ekonomıkaǵa tehnologııalar engizýi tıis. Іrgeli jáne qoldanbaly zertteýlerdiń basym baǵyttary aıqyndaldy. Olar memlekettik qarjylandyrýdyń esebinen de, mekemeler men bıznes qurylymdarynyń tarapynan da qoldaý tabady», - dedi ýnıversıtet basshysy.
