Sybaılas jemqorlyqtyń jolyn kesý ár adamnyń qolynan keledi – Altaı Kólginov
«Jumys eń aldymen jemqorlyqtyń sebepteri men jaǵdaılaryn boldyrmaýǵa ári joıýǵa baǵyttalýy kerek. Sebebi tek aldyn alý sharalarymen jáne alǵysharttardy joıýmen ǵana sybaılas jemqorlyq táýekelderin tómendetýge, sondaı-aq para alý nemese berý nıetin boldyrmaýǵa bolady. Bári de usaq-túıekten bastalady. Eńbekke jaramsyzdyq qaǵazyn satyp alý, jumysqa ornalasýǵa kómek sekildi mysaldardy aıtýǵa bolady. Sybaılas jemqorlyqtyń jolyn kesý ár adamnyń qolynan keledi. Zańsyz árekettiń táýekelderin tómendetýde tsıfrlyq tehnologııalardy engizý mańyzdy ról atqarady», - dedi ol.
Elorda basshysynyń aıtýynsha, birinshiden, bilim berý, densaýlyq saqtaý, kólik salalarynda ońtaılandyrý júrgizildi. Mekteptegi tamaqtandyrýda memlekettik satyp alýdy avtomattandyrylyp, densaýlyq pasporttary 100 paıyz tsıfrlandyryldy. Medıtsınalyq anyqtamalardy berýdiń zańdylyǵyn tekserý úshin aqparattyq servıs ázirlendi. Berilgen anyqtamaǵa QR kod jazylǵan, ony skanerlep, túpnusqa ekenin tekserýge bolady. Sondaı-aq avtobýstardy elektrondyq tólem júıelerimen 100 paıyz jaraqtandyryldy. Bul aqsha qarajatynyń 40 paıyzyn kóleńkeli aınalymnan shyǵarýǵa múmkindik berdi. Sonymen qatar, ınjenerlik jáne qalalyq jelilerdi jáne basqalaryn tsıfrlaý jumystary júrgizilip jatyr.
«Ekinshi. Ákimdik 159 memlekettik qyzmet kórsetedi, biz olardy 100% elektrondy formatqa kóshirdik. Osylaısha, adam faktory men qatysýy tolyǵymen alynyp tastalady. Buǵan iQala ortalyǵy, Turǵyn úı salasyndaǵy biryńǵaı qyzmet kórsetý ortalyǵy, Januıa sııaqty birqatar nysandarymyz kómektesedi. Úshinshi. Sybaılas jemqorlyqqa qarsy is-qımyl agenttiginiń «Astana - adaldyq alańy» birlesken jobasy aıasynda barlyq tórt aýdan ákimdigi front ofıs formatyna kóship, ashyq ákimdik rejıminde jumys isteýde», - dedi Altaı Kólginov.