Sybaılas jemqorlyqtan Eýroodaq jyl saıyn 120 mlrd. eýro kóleminde zardap shegedi
BRıÝSSELЬ. QazAqparat - Sybaılas jemqorlyqtyń keńinen etek alýy Eýroodaqqa múshe barlyq 28 memlekette de ózekti máselege aınalyp otyr. Odan keletin ekonomıkalyq shyǵyn jylyna 120 mlrd. eýrony quraıdy.
Bul týraly Brıýsselde ótken baspasóz konferentsııasynda ishki ister jónindegi eýrokomıssar Sesılııa Malmstrem sybaılas jemqorlyqqa qarsy kúres jaıynda baıandama jasaý barysynda habarlady. «Jemqorlyq azamattardyń demokratııalyq ınstıtýttarǵa jáne zańnyń ústemdigine degen senimin azaıtady, eýropalyq ekonomıkaǵa zalal keltiredi jáne memleketti qajetti salyq túsiminen aıyrady. Eýroodaqqa múshe memleketter sońǵy jyldary jemqorlyqpen kúreste kóp jumys atqardy. Alaıda búgingi tańda bul jumystardyń jetkiliksiz ekenin kórip otyrmyz», - dedi Malmstrem.
Ol baıandamanyń maqsaty - EO árbir elindegi jaǵdaıdy jeke-jeke saralap, sybaılas jemqorlyqqa qarsy kúrestiń tıimdiligin arttyrý úshin usynystar ázirleý bolyp tabylatynyn habarlady. Dál qazirgi kezeńde Bolgarııa men Rýmynııa elderi Eýrokomıssııanyń asa alańdaýshylyǵyn týdyryp otyr.
Malmstrem atap ótkendeı, Eýrokomıssııanyń kelesi qadamy EO elderiniń úkimetteri men parlamentterinde, sondaı-aq Eýroparlamentte jemqorlyqqa qarsy kúres máseleleri boıynsha kelissózder júrgizýdi bastaý bolmaq. EO atqarýshy bıligi joǵarǵy organynyń kelesi baıandamasy eki jyldan keıin jarııalanady.
