Sybaılas jemqorlyqpen kúreste halqymyz burynǵydan basqasha kózqarasty qalyptastyrdy - O. Ábdikárimov
ASTANA. Qazannyń 8-i. QazAqparat /Rýslan Ǵabbasov/ - Sybaılas jemqorlyqpen kúreste halqymyz burynǵyǵa qaraǵanda basqasha kózqarasty qalyptastyrdy. Bul týraly búgin Astanada Parlament Senatynyń depýtaty, «Nur Otan» HDP janyndaǵy Jemqorlyqpen kúres jónindegi respýblıkalyq qoǵamdyq keńestiń tóraǵasy Oralbaı Ábdikárimov aıtty.
«Jyl saıyn sybaılas jemqorlyqpen kúresý faktileri kóbeıip jatyr. Óıtkeni buny jemqorlyqpen kúresetin quqyq qorǵaý organdary jumysynyń nátıjesi dep aıtýǵa boldy. Sondaı-aq halqymyz burynǵyǵa qaraǵanda osyndaı máselege basqasha kózqarasty qalyptastyrdy. «Nur Otan» partııasy janyndaǵy qoǵamdyq keńes jumysynyń nátıjesinde osyndaı dertpen kúres turǵysynda halyqty oıata bastadyq deýge bolady»,-dedi depýtat.
«Qazirgi kezdegi ahýaldy baıqaıtyn bolsaq, azamattardyń ózderi quqyq qorǵaý organdaryna kelip, para surap otyrǵan adamdardyń áreketterin áshkerelep jatady. Buny da sońǵy kezdegi jańa kórinis dep aıtýǵa bolady. Atap aıtqanda, zań bárine birdeı. Sondyqtan jemqorlyqpen kúres baǵytynda laýazymdy adamdar da quryqtalyp jatyr»,- dep túıindedi O. Ábdikárimov.
