Sybaılas jemqorlyqpen kúreste grýzındik tájirıbe usynyldy

ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl jónindegi agenttik tóraǵasynyń kómekshisi Hakım Kúshqalıev polıtseılerge Grýzııadaǵy tájirıbeni úlgi etti, dep habarlaıdy QazAqparat.

«Almatyda polıtsııa qyzmetkerlerimen kezdesken bolatynbyz. Osy oraıda olarǵa Grýzııadaǵy ońtaıly ózgerister jaıynda aıtqan edim. Grýzındik polıtseılerden nemiz kem? Olarda 10 jyl buryn sybaılas jemqorlyqpen kúres bastaldy ǵoı. Úsh jyldyń aınalasynda turmystyq sybaılas jemqorlyqty túp-tamyrymen joıdy. Grýzııada eshbir polıtseı mundaı zańsyzdyqqa barmaıtynyn bilemiz. Osyny bir úlgi retinde aıtyp otyrmyn», - dedi ol elorda ákimdiginde «Astana - adaldyq alańy» jobasy aıasynda sybaılas jemqorlyqpen kúres máslesine arnalǵan keńeste.

Onyń sózine qaraǵanda, búginde sybaılas jemqorlyq máselesi elimizde áli de ózekti.

«Sondyqtan bul jaǵdaı aýqymdy ári qıyn másele bolyp tur. Bul turǵyda bir agenttik túrindegi bir ókiletti organnyń, ulttyq bıýronyń qarýymen problemany jalǵyz sheshe almaımyz. Árqaısymyz óz maqsatymyzdy oryndaımyz. Sondyqtan da sybaılas jemqorlyqqa tosqaýyl qoıý sharalaryn barshamyz birlese atqarýymyz kerek», - dep túıdi H. Kúshqalıev.

Budan buryn habarlanǵandaı, «Astana - adaldyq alańy» jobasy aıasyndaǵy keńes barysynda túrli dárejedegi basshylar baǵynyshty qyzmetkerlerdiń jemqorlyq quqyq buzýshylyqtary úshin tikeleı jaýapty bolatyny aıtyldy.