Sybaılas jemqorlyqpen kúresken kez-kelgen azamatty qorǵaıtyn bolamyn - N. Nazarbaev
ASTANA. 17 sáýir. QazAqparat /Qanat Mámetqazyuly/ - Sybaılas jemqorlyqpen kúresken kez-kelgen azamatty qorǵaıtyn bolamyn. Búgin Úkimette ótken keńeste Memleket basshysy Nursultan Nazarbaev osylaı málim etti.
«Sybaılas jemqorlyqpen kúres báriniń, onyń ishinde memlekettik organdardyń da ortaq mindeti. Osy baǵytta az jumys atqarylǵan joq. Álemdik sarapshylar da ony moıyndap jatyr, ózimiz de kórip otyrmyz. Bul rette barlyq birinshi basshylardyń nazaryn ózderi basqaratyn vedomstvolardaǵy, mınıstrlikterdegi, uıymdardaǵy sybaılas jemqorlyq quqyq buzýshylyqqa tikeleı jaýapkershilikte bolatyndyǵyna aýdartamyn. Sizder tikeleı osy jumysqa basshylyq jasap, tikeleı jaýapty bolasyzdar. Eskerte keteıin, basshylardyń orynbasarlary, departament, komıtet basshylary arasynda kez-kelgen jemqorlyq qylmys kórinis tabatyn bolsa, Joǵarǵy sottaǵy sekildi birinshi basshyny da birden otstavkaǵa ketiretin bolamyz. Іsker ári adal adamdy tańdańyzdar», - dedi N. Nazarbaev. Sonymen qatar, Prezıdent mysal retinde bir-eki oqıǵany alǵa tartty. «Densaýlyq saqtaý mınıstri S. Qaıyrbekova óz laýazymyna kelgen sátte, farmatsevtıka naryǵyndaǵy eki jaýapty qyzmetkerdi jumystan qýdy. Sol sátten-aq oǵan qarsy tek qońyraý ǵana emes, tapsyryspen maqalalar jazyldy. Endi ony tóbesinde qorǵap turǵan kim ekenin izdep júrgen sekildi. Ol menmin. Mınıstr budan keıin de bárin tártipke keltire berýi úshin osyndaı qoldap, qorǵashtaýdy jalǵastyramyn. Osy sekildi sybaılas jemqorlyqpen kúresken kez-kelgen adamdy qorǵaıtyn bolamyn», - dedi Elbasy.
