Sybaılas jemqorlyqpen kúres tıisti deńgeıdegi nátıjesin bermeı otyr - R. Muqashev
ASTANA. 29 sáýir. QazAqparat - Elimizde sybaılas jemqorlyqpen kúres sharalary tıisti deńgeıdegi nátıjesin bermeı otyr. Búgin Parlament Májilisinde «Jemqorlyqqa qarsy is-qımyl týraly» zań jobasyn talqylaýǵa arnalǵan eksperttik kezdesý barysynda Zańnama jáne sot-quqyqtyq reforma komıtetiniń tóraǵasy Rahmet Muqashev osylaı málim etti.
Komıtet tóraǵasynyń aıtýynsha, sybaılas jemqorlyq qubylysy memlekettik bılik qyzmetine halyqtyń senimdiligin joǵaltady. Sondyqtan da, osynaý áleýmettik qubylys ulttyq qaýipsizdikke tikeleı qater tóndiredi. «Sybaılas jemqorlyqpen kúreske qatysty elimizde negizinen oǵan qarsy turýdyń basty quqyqtyq-uıymdastyrýshylyq áreketteri qamtamasyz etildi. Sózsiz, negiz quraýshy zańnama normalary da barshylyq, olar udaıy jetildirilip, tolyqtyrýlar men ózgerister engizilýde. Degenmen, solaı bola tura bizdiń elimizde sybaılas jemqorlyqqa qarsy kúres tıisti deńgeıde kútiletin óz nátıjesin bermeı otyrǵanyn da moıyndaýymyz kerek», - dedi Rahmet Muqashev.
Onyń aıtýynsha, áleýmettik qubylys ta, problemalar da barshylyq. Olar belgili bir deńgeıde sheshilip te jatyr. «Alaıda bundaı qubylystarmen kúreste qandaı da bir nátıjege qol jetkizdik dep aıtýǵa áli de erterek. Bul rette, sybaılas jemqorlyqqa qarsy kúres boıynsha quqyqtyq tetikter keıbir jaǵdaıda halyqaralyq quqyqtyń talaptary men normalarynan birshama keıin qalyp otyrǵanyn da moıyndaýymyz kerek. Bul túptep kelgende júzege asyrylatyn sybaılas jemqorlyqqa qarsy kúrestiń tıimdilik deńgeıin de tómendetip otyr», - deıdi komıtet tóraǵasy.
