Sybaılas jemqorlyqpen kúres: Polıtseıler mereke tusynda da syılyq almaýy kerek
Kezdesý barysynda belgili qoǵam qaıratkeri Ǵosman Tóleǵul, Aqmola oblysy boıynsha sybaılas jemqorlyqqa qarsy is-qımyl departamenti janyndaǵy Óńirlik aqparattyq-aǵartý shtabynyń tóraǵasy retinde sóz sóılep, qatysýshylarǵa osy shtab jumysynyń negizgi baǵyttary jáne shtabtyń azamattardyń sybaılas jemqorlyqqa qarsy mádenıetin qalyptastyrýdaǵy mańyzy týraly aıtyp berdi.
Esterińizge sala keteıik, aǵymdaǵy jyldyń qarasha aıynyń sońynda Sybaılas jemqorlyqqa qarsy is-qımyl agenttigi janynan Respýblıkalyq aqparattyq-aǵartýshylyq shtab qurylǵan bolatyn. Onyń maqsaty - halyqpen syndarly dıalog qurý, keń aýqymdy aqparattyq-aǵartýshylyq jumys júrgizý arqyly parasattylyq qaǵıdattaryn nasıhattaý.
Shtab halyqtyń túrli toptary úshin ártúrli tásilderdi qoldana otyryp túsindirý kezdesýlerin ótkizýdi qarastyrady. Elimizdiń barlyq oblystarynda halyqty, onyń ishinde Aqmola oblysynda da, tolyq aýqymda qamtýdy qamtamasyz etý úshin óńirlik aqparattyq-aǵartý shtabtary jumys isteı bastady.
«Qazir biz azamattyq qoǵamdy shtab jumysyna aýdandyq deńgeıde tartý máselesin qarastyrýdamyz, osylaı biz sybaılas jemqorlyqqa qarsy is - qımyl máselelerine halyqtyń kóptep tartylýyn qamtamasyz ete alamyz», - dep atap ótti Ǵosman Tóleǵul.
Sonymen qatar, oblystyń sybaılas jemqorlyqpen kúres qyzmeti basshysynyń birinshi orynbasary Arman Berdalın qyzmetkerlerdi el Prezıdenti qol qoıǵan sybaılas jemqorlyqqa qarsy zańnamadaǵy jańa túzetýler týraly habardar ete otyryp, endi memlekettik organdardyń basshylary sybaılas jemqorlyqtyń aldyn alý máselesine asa muqııat jáne jaýapkershilikpen qaraý qajettigin atap ótti. Sebebi olarǵa baǵynyshty qyzmetkerdiń kez kelgen sybaılas jemqorlyq áreketteri úshin jáne ujymda aldyn alý sharalaryn oryndamaǵany úshin tikeleı jaýapkershilik júktelgen.
Arman Berdalın jańa jyldyq merekeler qarsańynda qyzmettik mindetterin oryndaýǵa baılanysty syılyqtardy almaýǵa jáne qabyldamaýǵa shaqyryp, olaı bolmaǵan jaǵdaıda jaýapqa tartylatyndaryn eskertti.
Sonymen qatar, kezdesýge qatysýshylar Departament tarapynan daıyndalǵan sybaılas jemqorlyqqa qarsy taqyryptaǵy beınematerıaldaryn kórdi.
Keńesti qorytyndylaı kele, oblystyq Polıtsııa departamenti bastyǵynyń orynbasary polıtsııa polkovnıgi Erlan Ospanov memlekettik organnyń jeke quramy arasynda sybaılas jemqorlyqtyń aldyn alý boıynsha qabyldanyp jatqan sharalar týraly baıandady. Sondaı-aq quqyq qorǵaý organdarynyń qyzmetkerleri, barlyq memlekettik qyzmetkerler úshin de osyndaı aldyn alý is-sharalaryn ótkizýdiń mańyzdylyǵyn atalyp ótti.