Sybaılas jemqorlyqpen kúres óz qatarymyzdy tazalaýdan bastalady - Qarjy polıtsııasynyń jańa tóraǵasy R.Túsipbekov
ASTANA. 23 qańtar. QazAqparat - Baspasóz málimdemesi: Qarjy polıtsııasy agenttiginiń jańa tóraǵasy bıznesti negizsiz tekserýdi jáne memlekettik qyzmetkerlerdi shetinen sybaılas jemqorlyq jasady dep aıyptaýdy toqtatýdy talap etti.
Qazaqstan Respýblıkasy Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasy) baspasóz qyzmetinen málim etkendeı, búgin atalmysh Agenttiktiń ujymyna jańa tóraǵa - Túsipbekov Rashıd Tóleýtaıuly tanystyryldy.
R. Túsipbekov, bárinen buryn, Qazaqstan Respýblıkasynyń Prezıdentine artyp otyrǵan joǵary senimi úshin alǵysyn bildirdi jáne óziniń barlyq bilimi men tájirıbesin júktelgen mindetterdi oryndaýǵa jumsaıtynyn atap ótti.
Elbasy barlyq memlekettik organdardan ekonomıkalyq qaýipsizdik pen qoǵamdyq turaqtylyqqa qater týǵyzatyn sybaılas jemqorlyq pen kóleńkeli ekonomıkamǵa qarsy ymyrasyz jáne qatań kúres júrgizýdi talap etedi. Sondyqtan, tóraǵamen qarjy polıtsııasy qyzmetkerleriniń aldynda zańbuzýshy kásipkerler men sheneýnikterdiń bıýdjet qarajatyn talan-tarajǵa salý, zańsyz jolmen tabylǵan tabystardy zańdastyrý jáne sybaılas jemqorlyq is-áreketteriniń jolyn kesý, zańsyz qoǵamdyq birlestikterdi, ekstremıstik jáne terrorıstik uıymdardyń destrýktıvtik qyzmetin syrttan jáne ishki qaınar-kózderden qarjylandyrý faktilerin anyqtaý jáne jolyn kesý boıynsha mindeti qoıyldy.
Agenttiktiń jańa tóraǵasy orta jáne shaǵyn bızneske qatysty negizsiz tekserýlerdi jáne memlekettik qyzmetkerlerdi shetinen sybaılas jemqorlyq jasady dep aıytaýdy toqtatýdy talap etti. R.Túsipbekov, eger orta jáne shaǵyn bıznes eldiń ekonomıkalyq negizi bolsa, memlekettik qyzmetker memlekettiń tiregi ekendigin atap ótti.
«Sybaılas jemqorlyqpen kúres óz qatarymyzdy tazalaýdan bastalady, al óz qyzmettik ýákilettikterin paıdaqorlyq maqsatta odan ári de zańsyz baıýy úshin qoldanýǵa nıetti qyzmetkerlerge qarjy polıtsııasynda oryn joq», - dedi R.Túsipbekov.
Qarjy polıtsııasy organdarynyń nátıjeleri retinde memlekettiń ekonomıkalyq qaýipsizdigi, kásipkerlik sýbektileriniń, qoǵam men memlekettiń zańdy quqyqtary men múddelderin qorǵaý, azamattardyń qarjy polıtsııasy organdaryna degen senimin arttyrý belgilendi.
Óz sózin qorytyndylaı kele, Qazaqstan Respýblıkasy Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy R.Túsipbekov, qarjy polıtsııasy organdarynyń qyzmetkerleri Prezıdenttiń senimin aqtaıtynyna senimin bildirdi.
