Sybaılas jemqorlyqpen kúres - memlekettiń jańa saıası baǵytyn júzege asyrýdaǵy mańyzdy shart - M. Tájın

ASTANA. 30 qyrkúıek. QazAqparat - Búgin Aqordada Qazaqstan Respýblıkasynyń Memlekettik hatshysy Marat Tájınniń tóraǵalyq etýimen QR Prezıdentiniń janyndaǵy Sybaılas jemqorlyqqa qarsy kúres máseleleri jónindegi komıssııanyń kezekti otyrysy bolyp ótti.

Onda sot organdary qatarynda sybaılas jemqorlyqtyń aldyn alý men oǵan qarsy is-qımyl, Jambyl jáne Shyǵys Qazaqstan oblystary ákimdikteriniń sybaılas jemqorlyqqa qarsy kúres boıynsha óńirlik josparlaryn iske asyrýda qabyldanǵan sharalary talqylandy.

Jıyndy ashqan Memlekettik hatshy Marat Tájın sybaılas jemqorlyqqa qarsy kúres «Qazaqstan-2050» strategııasy aıasyndaǵy memleketimizdiń jańa saıası baǵytyn iske asyrýdyń mańyzdy sharty bolyp tabylatynyn atap ótti.

«Sybaılas jemqorlyq - bul qoǵam men ekonomıkanyń damýyna kedergi bolatyn qaýipti qubylys. Bizdiń maqsat - memlekettik organdar qataryndaǵy jemqorlyq áreketterdiń aldyn alý, sondaı-aq, onymen belsendi kúresti júrgizý», - dedi M. Tájın.

Komıssııa otyrysy barysynda sot organdary jumysynyń sapasy quqyqtyq tártip jaǵdaıynyń ózekti ındıkatorlarynyń biri bolyp tabylatyndyǵy atalyp ótildi. Al sot sheshimderiniń zańgerlik minsizdigi men ádilettiligi azamattardyń konstıtýtsııalyq quqyqtary men bostandyqtaryn qorǵaý tıimdiligin belgileıdi. Sondyqtan da, Memleket basshysy byltyrǵy óz Joldaýynda sot júıesin odan ári jetildirýge erekshe nazar aýdarǵan bolatyn. Bul rette sot qyzmetiniń aıqyndylyǵyn, sýdıalardyń kásibı joǵary deńgeıi men jaýapkershiligin qamtamasyz etý basymdy mindet bolyp qala beredi.

Sonymen qatar, Komıssııa Jambyl jáne Shyǵys Qazaqstan oblystary ákimdikteriniń sybaılas jemqorlyqqa qarsy kúrestiń óńirlik josparlaryn iske asyrý boıynsha jumys qorytyndylaryn qarady.

Otyrystyń qorytyndysy boıynsha Komıssııa memlekettik organdarǵa Elbasy qoıǵan mindetterdi oryndaý boıynsha naqty usynystardy aıqyndady.