Sybaılas jemqorlyqpen kúres qyzmetine Qarjylyq monıtorıng agenttigimen birlesip jumys isteý usynyldy

NUR-SULTAN. QazAqparat – Prezıdenttiń Kómekshisi – QR Qaýipsizdik keńesiniń hatshysy Áset Isekeshev Sybaılas jemqorlyqqa qarsy is-qımyl agenttigine Qarjylyq monıtorıng agenttigimen birlesip jumys isteýdi usyndy, dep habarlaıdy QazAqparat.

«Іzdestirý jáne múlikti tárkileý jumystarynyń jetistiginde tárkileý qaǵıdattary men aqshany qadaǵalaý mańyzdy qural bolyp sanalady. Bul turǵydan naqty tapsyrma bar. Sondyqtan ony sapaly oryndaý úshin basqa memlekettik organdardyń, aqparattyq júıelerimen, ásirese Qarjylyq monıtorıng agenttigimen birge belsendi jumys isteý kerek», - dedi Qaýipsizdik keeńesiniń hatshysy.

Onyń aıtýynsha, sheneýnikterdiń qysymyna tap bolǵan kásipkerlerden túsetin shaǵym azaımaı otyr.

«Bıznesti bárinen buryn adal emes sheneýnikterden zańsyz kıligýinen arashalaý máselesi ózektiligin joıǵan joq. Kásipkerlerden pármendi ákimshilik qysymnan zardap shekkeni týraly shaǵymdar kóp túsýde. Árıne, bul jerde de adal kásipkerler men zańbuzýshylar arasynda teńgerim kerek. Sonyń ózinde Memleket basshylyǵy bızneske qoldaý kórsetýdi tapsyryp otyr. Ózderińiz bilesizder, jýyqta ǵana Prezıdent reıderlik úshin jaýapkershilikti kúsheıtetin zańǵa qol qoıdy. Mundaı reıderlikter kóbinese laýazymdyq ókiletin paıdalaný arqyly jasalady. Osyǵan nazar aýdarýlaryńyzdy suraımyn», - dedi Prezıdenttiń kómekshisi.