Sybaılas jemqorlyqpen kúres agenttigi elektrondyq bilezikter engizbek

NUR-SULTAN. QazAqparat – Qazaqstanda qamaýda ustaýǵa baılanysty emes bultartpaý sharasy qoldanylǵan azamattarǵa elektrondyq bilezikter taǵylýy múmkin, dep habarlaıdy QazAqparat tilshisi.

«QR Sybaılas jemqorlyqqa qarsy is-qımyl agenttigi qamaýda ustaýǵa baılanysty emes bultartpaý sharasy qoldanylǵan kezde elektrondyq baqylaý quraldaryn (elektrondyq bilezikter) qoldaný máselesin pysyqtaýda. Ozyq halyqaralyq tájirıbege súıene otyryp, atalǵan joba qylmystyq protsesti izgilendirýge jáne qamaýda otyrǵan adamdardy azaıtýǵa yqpal etedi», - deıdi Tsıfrlandyrý máseleleri boıynsha agenttik tóraǵasynyń kómekshisi Aslan Qusaıynov.

Sondaı-aq, joǵaryda kórsetilgen sharalardy qoldaný sharttaryn buzý faktilerine jedel den qoıýǵa jáne tergeý men sottan jasyryný áreketteriniń jolyn kesýge múmkindik beredi.

«Budan basqa, bul sybaılas jemqorlyqqa qarsy qyzmettiń kúshteri men quraldaryn tıimdi paıdalanýǵa yqpal etedi», - deıdi ol.