Sybaılas jemqorlyqqa qarsy zańnamany saqtamaǵany úshin 28 laýazymdy tulǵa jaýapkershilikke tartyldy
ASTANA. 11 shilde. QazAqparat /Qanat Mámetqazyuly/ - Sybaılas jemqorlyqqa qarsy zańnama talaptaryn saqtamaǵany úshin Astana qalasynda 28 laýazymdy tulǵa tártiptik jaýapkershilikke tartyldy. Bul týraly QR Bas prokýratýrasynyń baspasóz qyzmetinen habarlady.
Aǵymdaǵy jyly Astana qalasy Almaty aýdanynyń prokýratýrasy sybaılas jemqorlyqqa qarsy zańnamanyń saqtalýyna baılanysty birqatar memlekettik mekemelerge tekserý jumystaryn júrgizdi. Atap aıtqanda, Astana qalasynyń densaýlyq saqtaý, halyqty eńbekpen qamtý jáne áleýmettik baǵdarlamalar basqarmalary, Sý resýrstaryn paıdalaný jáne qorǵaýdy retteý boıynsha Esil basseındik ınspektsııasy, Aýyl sharýashylyǵy mınıstrliginiń agroóndiristik keshendegi memlekettik ınspektsııa komıtetiniń Astana qalasy boıynsha aýmaqtyq ınspektsııasy, salyq organdary, sondaı-aq bilim berý jáne densaýlyq saqtaý salalaryndaǵy memlekettik mekemelerinde tekserýler júrgizgen bolatyn. Osyǵan oraı, 2011 jyldyń 6 aıynda prokýrorlyq qadaǵalaý aktileri boıynsha anyqtalǵan sybaılas jemqorlyq zań buzýshylyqtarǵa baılanysty 28 laýazymdy tulǵa tártiptik jaýapqa tartyldy.
«Bul rette, memlekettik satyp alý salasyndaǵy zań buzýshylyqtarǵa baılanysty 21 tulǵa sybaılas jemqorlyq quqyq buzýshylyq jasaǵany úshin jaýapqa tartylsa, 7 tulǵa azamattardyń ótinishterin tıisti túrde qaramaǵany jáne lıtsenzııa men basqa da ruqsat qujattaryn berý tártibin buzǵany úshin jaýapqa tartylǵanyn atap ótý qajet. Qoldanystaǵy zańnamaǵa sáıkes, sheshim qabyldaý kezinde zańdy tulǵaǵa zańmen kózdelmegen artyqshylyq kórsetýmen negizdelgen sybaılas jemqorlyq quqyq buzýshylyq jasaǵany úshin atqaratyn laýazymynan bosatý túrindegi jaza belgilengen. Mysaly, «Astana qalasy densaýlyq saqtaý basqarmasynyń onkologııalyq dıspanser» MQKK-degi tekserý nátıjesi boıynsha osy mekemeniń satyp alý bóliminiń bastyǵy sybaılas jemqorlyqqa qarsy zańnamanyń jańa talaptarynyń negizinde, sybaılas jemqorlyq áreket jasaǵany úshin qyzmetinen bosatyldy. Jalpy, komıssııa músheleri tarapynan memlekettik satyp alý boıynsha sheshim qabyldaý kezinde zańdy tulǵaǵa zańda kózdelmegen artyqshylyq kórsetilýine baılanysty, onkologııalyq dıspanserdiń bas dárigeri men basqa da 5 laýazymdy tulǵasy tártiptik jaýapkershilikke tartyldy», - delingen prokýratýra baspasóz qyzmeti taratqan aqparatta.
