Sybaılas jemqorlyqqa qarsy zań jobasynyń maqsaty - jeke jáne zańdy tulǵalardyń quqyqtary men múddelerin qorǵaý - depýtat D.Qusdáýletov
ASTANA. QazAqparat - Búgin «Nur Otan» partııasynyń bastamasymen «Sybaılas jemqorlyqqa qarsy is-áreket týraly» zań jobasy aıasynda sybaılas jemqorlyqqa tótep berý tetikterin jetildirý» taqyrybynda dóńgelek ústel ótti.
Otyrystyń ashylýynda sóz sóılegen QR Parlamenti Senatynyń depýtaty D.Qusdáýletov «Sybaılas jemqorlyqqa qarsy is-áreket týraly» zań jobasy QR-dyń 2015-2025 jyldarǵa arnalǵan sybaılas jemqorlyqqa qarsy strategııasynyń, Memleket basshysy N.Nazarbaevtyń 5 ınstıtýttyq reformasyn júzege asyrý jónindegi «100 naqty qadam» Ult josparynyń 13-shi qadamyn oryndaý aıasynda ázirlengenin atap ótti.
Al shara aıasynda BAQ ókilderine suhbat bergen QR Parlamenti Májilisiniń depýtaty Svetlana Bychkova: «Ázirshe, qoǵam jemqorlyqqa tózimdi bolyp turǵan sátinde eshqandaı da jazalaý sharasy, memlekettik qyzmetshilerge baqylaý naqty nátıje bermeıdi. Eń bastysy bul qoǵamda jemqorlyqqa jat kórinis retinde keri serpý qarym-qatynasyn oıatý qajet. Árıne, ol úshin adamdardyń boıynda quqyqtyq mádenıetti qalyptastyryp, bul baǵyttaǵy bilimderin jetildirý qajet», - dedi.
Onyń sózine qaraǵanda, elimizde qabyldanyp jatqan barlyq jemqorlyqqa qarsy qujattarda qoǵamda jemqorlyqqa tózbeýshilikti damytýǵa erekshe mán berilgen.
Sonymen qatar, ol óz sózinde atalǵan zań jobasynyń maqsaty qoǵamdaǵy sybaılas jemqorlyqty joıý, jeke jáne zańdy tulǵalardyń quqyqtary men zańdy múddelerin qorǵaý, memlekettik apparat pen basqa da salalardaǵy sybaılas jemqorlyq kórinisterinen paıda bolatyn qaýipterden elimizdiń ulttyq qaýipsizdigin qamtamasyz etý bolyp tabylatyndyǵyn basa aıtty.
