Sybaılas jemqorlyqqa qarsy volonterlik: Atyraýdaǵy alǵashqy nátıje
Sybaılas jemqorlyqqa qarsy is-qımyl agenttigi Atyraý oblystyq departamenti basshysynyń birinshi orynbasary Nurlan Jahınniń aıtýynsha, «Sybaılas jemqorlyqqa qarsy volonterlik» eriktiler jobasy iske qosylǵan.
«Jobanyń maqsaty – belsendi azamattardy, qoǵamdyq birlestikterdi, jeke jáne kvazımemlekettik sektor sýbektilerin, sondaı-aq basqa da uıymdardy sybaılas jemqorlyqqa qarsy is-sharalarǵa erikti retinde tartý. Joba aıasynda eriktiler birneshe baǵyt boıynsha jemqorlyqqa qarsy kúreste kómek kórsete alady», - dep habarlady Nurlan Jahın.
Onyń pikirinshe, birinshi baǵyt – qoǵamdyq baqylaý. Munyń basty tarmaǵy monıtorıng júrgizip, qorytyndysymen bólisýge baılanysty bolyp otyr. Monıtorıngti memlekettik satyp alý portalynda baǵany kóterý mánine, bıýdjet qarajatyn jumsaý tıimdiligine, óńirdiń problemalyq máselelerine, tıisti jumys sapasy joq obektilerge, aýyl sharýashylyǵy maqsatyndaǵy jerlerdi paıdalanýǵa, ulttyq jobalardy, óńirlerdi damytý josparlaryn iske asyrýǵa, aqparattyń qoljetimdiligin qamtamasyz etý bóliginde zańnama talaptarynyń saqtalýyna, áleýmettik mańyzy bar mekemelerdiń jaı-kúıine monıtorıng júrgizýge bolady.
Ekinshi baǵyt – sybaılas jemqorlyqqa qarsy zertteý jáne aǵartý. Eriktilerge sybaılas jemqorlyq problemalaryn zertteý, keıinnen ony joıý jáne aldyn alý boıynsha usynystar ázirleý usynylyp otyr. Sondaı-aq, stýdentter arasynda sybaılas jemqorlyqqa qarsy mádenıetti qalyptastyrý, atalǵan qylmysqa qarsy sheshimderdi ázirleý, forýmdar, konferentsııalar, semınarlar sekildi is-sharalardy uıymdastyrý, fılmder, serıaldar túsirý ádisimen kontent jasaýǵa qatys, áleýmettik rolıkter ázirleý bar.
Al, Pro bono volonterlik baǵytynyń aýqymy keń. Bul baǵytta advokattar men notarıýstardyń, sot oryndaýshylarynyń, kásipodaqtar men ardagerler uıymdary ókilderiniń azamattar men eńbek ujymdaryna tegin quqyqtyq kómek kórsetýi kózdelgen. Komplaens-ofıtserlerdi praktıkalyq oqytý, sybaılas jemqorlyq táýekelderin jáne oǵan qarsy monıtorıngterdi syrtqy taldaýǵa sarapshylardy tartylady.
Tórtinshi baǵyt – korporatıvtik eriktilik. Osy oraıda tutynýshylarǵa beriletin talondar men túbirtekterdiń artqy betine sybaılas jemqorlyqqa qarsy bannerlerdi ornalastyrý, sybaılas jemqorlyqqa qarsy push-habarlamalardy jiberý kontentti ilgeriletý atqarylady.
«Osy joba aıasynda Atyraý volonterleri Isataı aýdanynyń ortalyǵy – Aqqystaý aýylyndaǵy kentishilik joldardy qaıta jańartý kezinde bıýdjet qarajatynyń tıimsiz jumsalǵanyn anyqtady. Volonterler atalǵan aýyldaǵy Dostyq jáne Abaı kóshesindegi asfaltbeton jabyndysynyń buzylǵany, shuńqyrlar týraly aqparatty Antıkorǵa jiberdi. Atap aıtqanda, Isataı aýdany ákimdiginiń laýazymdy tulǵalary Isataı aýdandyq TKSh bólimi men «Informstroıservıs» JShS arasynda kentishilik joldardy rekonstrýktsııalaýǵa 1,4 mlrd teńge somaǵa jasalǵan qoldanystaǵy shart sheńberinde atqarǵan jumysy týraly jalǵan aktilerge qol qoıdy», -dep habarlady departamenttiń baspasóz qyzmeti.
Qazir bul derek rastalyp otyr. Sonyń nátıjesinde bıýdjettiń 78 mln teńgeden astam qarjysyn jymqyrý qaýpi anyqtalǵan.
Eske sala ketelik, budan buryn Atyraý oblysynda aýrýhanalardyń kásipkerlerge qaryzy 1,4 mlrd teńgeden asatynyn jazǵan edik.
