Sybaılas jemqorlyqqa qarsy qyzmetke kelip túsetin ótinishter sany artyp keledi - agenttik
«Halyq únine qulaq asatyn memleket» tujyrymdamasyn iske asyrý aıasynda Agenttik halyqpen ózara is-qımyldy ashyqtyq, sondaı-aq azamattardyń ótinishterine jedel jáne tıimdi den qoıý qaǵıdattaryna negizdeýmen qamtamasyz etedi. Sybaılas jemqorlyqqa qarsy qyzmette azamattardyń senimi qyzmettiń tıimdiligin baǵalaýdyń basty krıterııi bolyp sanalady. Bıyldyń 2 aıynda sybaılas jemqorlyqqa qarsy qyzmetke 1 676 ótinish kelip tústi, bul ótken jyldyń uqsas kezeńindegi (1 542) kórsetkishpen salystyrǵanda, 8 paıyzǵa kóp. Ortalyq apparatqa kelip túsken ótinishterdiń úlesi 30 paıyzdy quraıdy. Ótinishter sanynyń ósýi halyqtyń quqyqtyq saýatynyń artýymen, sondaı-aq azamattarmen keri baılanystyń turaqty túrde jetildirilýimen baılanysty dep sanaımyz», - dedi N. Sadybekov onlaın brıfıngide.
Onyń aıtýynsha, COVID-19 pandemııasy jaǵdaıynda karantın shekteýleriniń engizilýine baılanysty, 2020 jylǵy naýryz aıynan bastap Sybaılas jemqorlyqqa qarsy qyzmette azamattardy jeke máseleleri boıynsha qabyldaý shektelgen. Bul rette Agenttik basshylyǵy pandemııa jaǵdaıynda qaýipsizdikti saqtaý maqsatynda azamattardy qabyldaýdy beınekonferentsııa baılanysy arqyly júzege asyrady. Shalǵaı jerlerde turatyn azamattar qashyqtan qosylady.
«2021 jyldyń 2 aıy ishinde Sybaılas jemqorlyqqa qarsy qyzmettiń aýmaqtyq departamentterinde 258 qabyldaý ótkizilip, 374 azamat 312 másele boıynsha qabyldandy. Agenttiktiń basshy quramy 2021 jyldyń 2 aıy ishinde azamattarǵa 19 jeke qabyldaý ótkizdi», - dedi basqarma basshysy.
Ótinishterdi qabyldaýdyń dástúrli nysandarymen qatar, halyqpen ózara is-qımyl Agenttiktiń «Call-ortalyǵynyń» jumysy aıasynda jolǵa qoıyldy. Bıyldyń basynan beri 1 424 Call-ortalyqqa 812 ótinish kelip tústi.
